In nomine sancte et individue trinitatis. Henricus divina favente clementia quartus Romanorum imperator augustus. Imperialis est maiestatis et sacrosanctis ecclesiis reverentiam et fidelibus nostris deferre clementiam, utrisque nostre liberalitatis munificentiam exhibeamus. Unde notum fieri cunctis Christi nostrisque fidelibus tam presentibus quam futuris volumus Pisane civitatis legatos, hoc est Petrum filium Albici consulem, virum clarum nobisque satis carum, Petrum vicecomitem nostrum, virum nobilem et sapientem, et Tiapaldum iurisconsultum, fidelem nostrum, nostram adiisse benignitatem suorumque concivium protulisse petitionem, quorum precibus duplici ratione moti decrevimus indulgendum esse, vel quia pro ecclesie beneficiis, quod religiosum erat, intervenirent, vel qoniam ipsis digne meritoque tribuenda esset audientia, qui eodem anno non parum glorie nostro imperio, sed cuncto christiano populo suis et laboribus et impensis [et] periculis addidissent, cum Maioricam copiosam civitatem nec minus populosam vi bellica devictam cum aliis locis adiacentibus funditus everterent. Quapropter eorum postulationi libenter annuentes curtem Liuurnam et Papianam in valle Sercli iacentem cum omnibus suis appenditiis et accessionibus, hoc est utriusque sexus mancipiis, edificiis, areis, agris, pratis, pascuis, terris cultis et incultis, aquis aquarumque decursibus, piscationibus, molendinis, exitibus et redditibus, viis et inviis, quesitis et inquirendis, concedimus et tradimus ad utilitatem atque edificationem Pisane ecclesie beate et gloriose virginis perpetue et dei genitricis Marie, ut ex nostra liberalitate iamdictorum prediorum subsidio in omne evum substentetur. Quam largitionem nostram et donationem si qua persona parva seu magna violare vel quoquomodo infringere temptaverit, III centum librarum auri optimi pene se sciat obnoxium, cuius dimidium quidem nostris scriniis, dimidium vero prefate sacrosancte ecclesie persolvat. Cuius donationis argumentum huic instrumento inscribi atque hoc nostra manu propria, quod inferius apparet, corroboratum sigilli nostri impressione iussimus insigniri.

Signum domni Henrici quarti Romanorum imperatoris invictissimi.

Burcardus cancellarius et episcopus Monasteriensis recognovit.

Data VII. kl. iulii, indictione VIIII, anno dominice incarnationis millesimo CXVI, regnante Henrico quinto rege Romanorum anno X; imperante VI; actum est Pasilianum; in Christo feliciter amen.