In nomine sancte et individuę trinitatis. Henricus divina favente clementia quartus Romanorum imperator augustus. Quod et aliis ecclesiis intuitu religionis nonnumquam impartiri solemus, hoc pręcipue et Pisanam ecclesiam a nobis impetrare non rennuimus. Unde legatorum Pisanę civitatis, hoc est Petri consulis, clarissimi viri, item Petri vicecomitis nostri atque Tiebaldi iurisconsulti, nostri fidelis, postulationi benignitatis aures accomodantes prędictam sacrosanctam ecclesiam virginis et dei genitricis Marię in nostram defensionem recipimus eique publicarum functionum inmunitatem pia devotione deferimus, quo magis valeat libere divinis ministeriis invigilare divinisque pręceptis obsecundare. Pręcipientes ergo pręcipimus, ut ne ullus vel dux vel marchio seu iudex publicus vel aliqua publica persona ingredi audeat in ecclesias aut villas, loca vel agros seu quaslibet possessiones, quas sub imperio nostro supradicta Pisana ecclesia iam nunc possidet vel habet vel in futurum possidebit vel habebit, neque ad causas audiendas nec ad freda exigenda aut mansiones vel paratas ibi faciendas aut fideiiussores aut homines ipsius ecclesię constringendos, sed nec pręstationes ullas aut illicitas exactiones a quoquam hominum ibidem requirendas aliquo tempore concedimus, sed liceat his, qui vel nunc in eadem venerabili ecclesia divinis ministeriis insistunt vel in futurum in eorum locum succedunt, omnes prędictas ordine res quieto possidere eoque liberius tam pro nobis quam pro totius imperii statu divinam misericordiam exorare. Si quis autem hoc nostrę serenitatis pręceptum contempnere vel in aliquo violare pręsumpserit, sciat se pęnali centum librarum optimi auri obligatione constringi, cuius dimidium nobis, dimidium pręfatę venerandę ecclesię inferant. Ne autem super his omnibus aliqua suboriatur ambiguitas, sigilli nostri impressione pręsens instrumentum iussimus signari.

Signum domni Henrici quarti Romanorum imperatoris invictissimi. (M.9.)

Burcardus cancellarius et Monasteriensis episcopus recognovit.

Data VIII. kal. iulii, indictione VIIII, anno dominicę incarnationis millesimo CXVI, regnante Henrico quinto rege Romanorum anno X, imperante VI; actum est; in Christo feliciter amen.