In nomine sancte et individue trinitatis. Henricus divina favente clementia quartus Romanorum imperator augustus. Omnibus sanctę dei ecclesię et nostris fidelibus tam futuris quam presentibus notum fieri volumus, qualiter nos interventu nostre dilecte contectalis Mathildis regine et episcoporum religiosorum, Bernardi Parmensis episcopi, Landulfi Astensis episcopi, Victoris Boloniensis episcopi, Sigefredi Uercellensis episcopi, Epponis Nouariensis episcopi, necnon venerabilis Pontii Cluniacensis abbatis atque Dodonis monachi, fidelis nostri, et pro remedio animę nostrę nostrorumque parentum ęcclesiam de Wirada in honore sancti Petri constructam, sitam in episcopatu Cremonensi, sub nostra tutela et mundiburdio suscepimus cum omnibus bonis suis, adquisitis vel adquirendis, possessionibus mobilibus et immobilibus et utriusque sexus familie necnon allodiis, precariis, libellariis et cum omni utilitate, que de his exire vel provenire solent, ea videlicet conditione, ut nullus deinceps archiepiscopus, episcopus, marchio, comes, vicecomes, gastaldio, scultatius, abbas seu aliqua magna sive parva persona predictam ęcclesiam vel fratres inibi deo famulantes de suprascriptis bonis audeat inquietare, molestare vel disvestire. Si quis vero, quod absit, aliquo temerario ausu contra hoc ire temptaverit, auri optimi libras centum componat, medietatem camere nostrę et medietatem supradictę ecclesię vel fratribus ibidem deo militantibus. Quod ut verius credatur (ergänze et bzw. ac) ab omnibus inviolatum et inconvulsum omni tempore permaneat, hanc cartam inde conscriptam et manu propria corroboratam impressione nostri sigilli, ut apparet inferius, insigniri iussimus.

Signum domni Henrici quarti (M.9.) Romanorum imperatoris invictissimi.

Burchardus cancellarius et episcopus Monasteriensis recognovit.

Data IIII. kl. iunii, indictione VIIII, anno dominice incarnationis millesimo centesimo XVIo, regnante Henrico quinto rege Romanorum anno XIo, imperii vero illius VIo; actum est Fontane; in Christo feliciter amen.