(SN.) Dum in dei nomine die sab[ato, que fu]it III. idus madii, in loco GubernuIę, scilicet prope ecclesiam, H[enricus] d[ei] gracia quintus Romanorum imperator augustus in iudicio resideret ad iusticias faciendas ac deliberandas, adessent cum eo Wernerius Bononiensis, Vbaldus de Carpenetha, iudices, Arduinus de Palude, Opizo de Gunzaga, Sasso de Bibianello, Girardus de Plaza, Sicfredus de Bondeno, Rolandus de Runco Rolandi, Ratikerius de Gunzacha, Odo de Mulo et reliqui quamplures viri nobiles, ibi in illorum veniens presenciam Wibertus prior de curte Melara sancti Saluatoris uná cum fratre suo Iohanne presbitero cepit postulare mercedem deo ac domno imperatori piissimo, ut ipse iusticiam faceret de tanta opressione, quam de predicta corte Melara sancti Saluatoris a ministris comitissę de Reuere iniuste paciebatur. Tunc domnus imperator, iusticę (!) pacisque amator ac omnium ecclesiarum defensor, misericordia motus, per iudicum consilium, per lignum, quod in sua tenebat manu, bannum imperiale super predictum Uuibertum priorem et super curtem Melaram et super omnes res et posessiones, piscaciones, venaciones et super omnia bona et iura, que prefata ecclesia sancti Saluatoris in curte Melara vel extra curtem tunc habebat vel inantea deo propicio adquisitura erat (!) legittime, scilicet ut nullus patriharcha, archiepiscopus, episcopus, dux, marchio, comes, vicecomes, capinaneus (!), vavassor, advocatus, gastaldio, villicus, decanus vel aliqua magna parvaque persona predictum priorem suosve succesores de prefata curte Melara vel de cella sancti Stephani sine legali iudicio disvestire, molestare vel inquietare audeat. Qui vero infringere hoc preceptum temptaverit, sciat se compositurum centum libras auri, medietatem imperatoris camere et medietatem predicto priori sancti Saluatoris suisve successoribus eisdem ecclesiis sancti Saluatoris et Stephani de Melara servientibus. Factum est hoc anno ab incarnacione domini nostri Iesu Christi millesimo CXVI, indictione VIIII.

.H. dei gracia.R. + imperator augustus.

(+) Ego Wernerius iudex affui et subscripsi.

(S.) Ego Vbaldvs iudex interfui et subscripsi.

(SN.) Ego Obertus domni Henrici imperatoris iudex interfui et per eiusdem imperatoris preceptum hanc noticiam scripsi.