(SN.) Dum in dei nomine, die sabati, que est sexta dies intrante mense madii, in loco Gubernule, scilicet in canonica sancti Remigii, Henricus dei gratia quartus Romanorum imperator augustus in consilio staret pro sui imperii suorumque fidelium utilitate, adessent cum eo Wernerius Bononiensis, Vbaldus de Carpenétha, Ribaldus Ueronensis, iudices, Albertus comes de Martoringo, Albertus comes de Sablonetha, Maltrauersus, Girardus de Boso, Arduinus de Palude, Guido de Maifredo, Sasso de Bibianello, Maledubatus, Albertus et Bernardus frater eius, Girardus de Cornazáno et reliqui quamplures viri nobiles, ibi in illorum veniens presentiam Martinus sanctę Marię monasterii Pomposę monachus uná cum Martino de sancto Marino et Iohanne de Bertulasco ceperunt petere ac postulare mercedem domno Henrico imperatori piissimo, ut predicto monasterio sanctę Marię de Pomposa iusticiam faceret de Vbaldo Ugonis filio de Maifredo, qui iniuste turbaverat posessionem de quadam terra, quam predictum monasterium tenuerat in loco, qui dicitur Solera Uberti. Vbaldus autem Conradum comitem auctorem nominavit. Sed idem comes Conradus paucis ante diebus per ipsius imperatoris sententiam super eadem posessione victus fuerat. Iussit ergo imperator, ne predictus Ubaldus aliquam molestiam eo nomine contra predictum monasterium faceret, et insuper per iudicum consilium, per lignum, quod in sua tenebat manu, bannum super Martinum monachum in vice totiusque congregationis et nominatim scilicet de predicta posessione et insuper de omnibus posessionibus et rebus, quas predictum monasterium tunc temporis habuit vel in futurum adquirere potuerit cum racione, ut nullus dux, marchio, comes, capitaneus, vavassor vel aliqua magna parvaque persona predictum monasterium de prenominatis rebus sine legali iudicio disvestire vel inquietare audeat. Quodsi quis hoc preceptum in aliquo violare temptaverit, sciat se compositurum centum libras auri, medietatem imperatoris camere et medietatem predicto monasterio. Factum est hoc anno ab incarnacione domini nostri Iesu Christi millesimo CXVI, indictione VIIII.

+ Hoc signo crucis idem imperator hanc noticiam corroboravit.

(+) Ego Wernerius iudex affui et subscripsi.

Ego Ribaldus iudex interfui et subscripsi.

(S.) Ego Vbaldus iudex interfui et subscripsi.

(SN.) Ego Obertus domni Henrici imperatoris iudex interfui et per eiusdem imperatoris preceptum hanc noticiam scripsi.