(C.) In nomine sanctę et individuę trinitatis. Heinricus divina favente clęmentia quintus Romanorum rex. Iusticiam cuique facere cum omnium sit generaliter, nostri solummodo est principaliter, quia ad hoc in regali dignitate cęteris preminemus mortalibus, ut iudicium et iusticiam faciamus om[n]ibus iniuriam patientibus. Quapropter notum sit omnibus Christi nostrique fidelibus tam futuris quam pr[e]sentibus, qualiter Berengozus abbas et fratres ex monasterio sancti Iohannis ewangelistę sanctique Maximini preciosissimi confessoris nostram regalem adiere clementiam flagitantes, ut pro timore dei et amore iusticię quasdam curtes et possessiones, agros et vineas a prebenda illorum iniuste ablatas eis restitueremus et restitutas nostro regali precepto confirmaremus. Quorum petitionem cum propter amorem dei tum ob reverentiam sancti Iohannis evangelistę et sancti Maximini et ob interventum fidelium nostrorum, Ruothardi videlicet Mogontiacensis, Brunonis Treuirensis Friderici Coloniensis, Cuonradi Salzburgensis, venerabilium archiepiscoporum, Gebehardi Constantiensis, Burchardi Monasteriensis, Vdonis Hildinesheimensis, Ottonis Babenbergensis, Arlongi Wirziburgensis, venerabilium episcoporum, Berhtolfi ducis, Berengeri, Sigefridi, Wicperdi, Godefridi, Herimanni, comitum, aliorumque fidelium nostrorum, has duas curtes, unam vocabulo Mannendal in pago Nahgowe sitam, quam Cuono quidam de Sueuia iniuste detinuit, aliamque curtem Gunthereshusun vocatam, quam Adelbertus quidam de Leia per aliquot annos iniuste possedit, bona etiam sua, quę in villa Wilere iuxta Metensem civitatem et in suburbio ipsius et in ipsa urbe in vineis et areolis quidam Heisso de Ruticho hactenus violenter habuit, sive quod Heinricus dux in villa Leznih per aliquot tempus fratribus abstulit, insuper etiam duodecim mansos ultra Rhenum in villa Aschabah, quos Gerhardus quidam de Diedisse a Willihelmo comite iniuste detinuit, septem vero mansos in villa Liutestarra dicta, quos Ruodolfus quidam de Marciche a prebenda fr[atr]um iniuste subtraxit, has igitur curtes sive possessiones prefato abbati ac fratribus reddimus, firmamus et in ęternum sancto Iohanni sanctoque Maximino stabilîmus, ea videlicet ratione, ut nec aliquis successorum nostrorum regum vel imperatorum nec p[re]dictus abbas nec aliquis successorum suorum quicquam de eisdem rebus alicui umquam dare, prestare vel vendere presumant, sed fratres îdem inde consolati pro nostra vita temporali et aeterna obnixius deo suplicare prevaleant. Et ut hoc p[re]sens regalitatis nostrę p[re]ceptum firmum inde semper et stabile permaneat, manu propria subtus firmavimus et sigilli nostri impressione insigniri iussimus.

Signum domni Heinrici quinti Romanorum (M.) regis invictissimi. (SI.)

Adelberdus cancellarius ad vicem domni Ruothardi archicancellarii recognovi.

Data VII. non. mai, anno incarn[ationis] domini millesimo CVIIo, indictione XV, anno regni domni Heinrici quinti regis VIIIIo; actum Mogontie; in dei nomine feliciter amen.