(C.) In nomine sanctę et individuę trinitatis. Heinricus divina favente clęmentia quintus Romanorum rex. Iusticiam cuique facere cum omnium sit generaliter, nostrum est principaliter, quia ad hoc in regali culmine cęteris preminemus, ut iudicium et iusticiam faciamus omnibus iniuriam patientibus. Quapropter notum sit omnibus Christi nostrique fidelibus tam futuris quam presentibus, qualiter Berngozus abbas et fratres ex monasterio sancti Iohannis ewangelistę sanctique Maximini confessoris, qui in suburbio Treuirorum corporaliter in eodem cęnobio quiescit, nostram regalem adiere clementiam flagitantes, ut pro timore dei et amore iusticię quandam curtem vocabulo Mannendal in pago Nahgouue sitam, quam quidam Kuono de Sueuia iniuste iam diu possederat, eis restitueremus et restituta nostro regali precepto confirmaremus. Quorum petitionem propter amorem dei et ob venerationem sancti Iohannis sanctique Maximini et ob interventum domni Ruothardi Mogonciensis archiepiscopi et Burchardi Monasteriensis, Gebehardi Constantiensis, Ottonis Babenbergensis, Arlongi Wirziburgensis, Vdonis Hildinesheimsis, Iohannis Osenbruggensis, Kuononis Strazburgensis, Ruodolfi Basiliensis venerabilium episcoporum aliorumque fidelium nostrorum adimplere cupientes prefatam curtem Mannendal, et quod in villa Narheim ad eandem curtem pertinet, prefato abbati ac fratribus reddimus, firmamus et in eternum sancto Iohanni sanctoque Maximino stabilîmus, ea videlicet ratione, ut nec aliquis successorum nostrorum regum vel imperatorum nec predictus abbas nec aliquis successorum suorum eandem curtem alicui umquam dare, prestare, vendere vel invadiare presumant, ut fratres idem inde consolati pro nostra vita temporali et ęterna et pro animabus parentum nostrorum et pro om[n]ibus fidelibus vivis et defunctis obnixius deo supplicare prevaleant. Et ut hoc pręsens regalitatis nostre preceptum firmum semper et stabile permaneat, manu propria subtus firmavimus et sigilli nostri impressione insigniri iussimus.

Signum domni Heinrici quinti Romanorum (M.) regis invictissimi. (SI.F.)

Adelberdus cancellarius vice Ruothardi archicancellarii et archicapellani recognovi.

Data VI. non. mai, anno incarn[ationis] domini MCVIIo, indictione XV, anno regni domni Heinrici quinti regis VIIIIo; actum Mogoncie; in dei nomine amen.