(+) Die dominica, que est IIII. idus marcii, in regno Veneciarum, in palacio ducis, scilicet in camera, dum in dei nomine Henricus dei gracia quintus Romanorum imperator augustus reclamationem ecclesiarum audiens, adessent cum eo Teuzo, Ribaldus, Adam, Eichardus, iudices, Anto iurisperitus, Ordelaffus dei gracia Venetie dux, patriarcha dei gracia Gradensis, Gebardus episcopus Tridentinus, episcopus Castellanus, Iohannes episcopus Caprulensis, Petrus Michael Adrianensis episcopus, Albertus comes de Martoringo, Henricus Welfonis ducis frater, Henricus comes, Odelricus comes de Piano et Petrus Guntarinus vicedominus et Berengarius Contarinus, Stenus Zianus, Petrus Gradonicus et reliqui plures, ibi in illorum presentia dominus imperator, iusticie amator omniumque ecclesiarum defensor, pro dei amore et sancti Zacharie et sancti Pancracii et prece eiusdem cenobii Adiute Michaelis abatisse suarumque sanctimonialium et suorum principum aliorumque fidelium rogatu et per iudicum consilium, per lignum, quod in sua tenebat manu, suum imperiale bannum misit super Iohannem Bonum, plebanum, et advocatum eiusdem sancti Zacharie monasterii et super omnibus rebus mobilibus et immobilibus, quas possidet usque modo predictum monasterium, nominatim in Monte Silice curtem unam positam in villa, que vocatur Petriolo, una cum ecclesia in honore sanctorum Thome et Zenonis, cum omnibus illarum pertinentiis, et castrum Runcum, quod Milo marchio eidem monasterio tribuit, et omnia que Ingelfredus comes una cum Ingelburga comitissa eidem monasterio tribuerunt, et unam curtem positam in loco, qui dicitur Cona, una cum ecclesia sancte Marie, et super omnia, que habet vel que legitime prenominatum monasterium adquisierit, imperando, ut nullus patriarcha, dux, archiepiscopus, episcopus, abas, marchio, comes, vicecomes, advocatus, vicedominus, gastaldio, villicus, decanus vel aliqua magna parvaque persona prenominatam abatissam suasque successores sine legali iudicio disvestire vel inquietare audeat. Quodsi quis hoc edictum fregerit aut occasione tolonei aut arbergarie, sciat se compositurum centum libras auri, medietatem imperatoris camere et dimidiam predicte abatisse suisque successoribus. Factum est hoc anno ab incarnacione domini nostri Iesu Christi millesimo CXVI, indictione VIIII.

+

Ego Teuzo iudex interfui et subscripsi.

Ego Adam iudex interfui et subscripsi.

Ego Anto advocatus interfui et subscripsi.

Ego Ribaldus iudex subscripsi.

(SN.) Ego Obertus iudex interfui et hanc noticiam ex illius iussione imperatoris scripsi.