Domino P. summo pontifici H. dei gratia Romanorum imperator augustus obędientiam et dilectionem in Christo velut filius patri. Compertum habemus, pater venerande, te propter nos gravi controversia et plurimis affectum esse molestiis, quapropter ob reverentiam tui, deo teste, gravius tuis quam propriis angimur inconmodis. Idcirco abbatem Cluniacensem ad hoc negocium ascivimus, scilicet virum religiosum et in fide Christi et ecclesię spectabilem. Hunc quoque super hac causa tuę paternitati direximus parati secundum consilium tuum et ipsius et cęterorum religiosorum pacem ecclesię diligentium te ab his molestiis eripere et pacem et concordiam inter me et te indissolubiliter stabilire.