(C.) In nomine sanctae et individue trinitatis. Heinricus divina favente clementia quartus Romanorum imperator augustus. Si dignis petitionibus fidelium nostrorum adquieverimus, si beneficiis eos frequenter sublimaverimus, pro certo scimus, quia semper illos devotiores habebimus et tranquilliori statu cursum vitę ducere poterimus. Quapropter omnibus Christi nostrique fidelibus tam futuris quam presentibus notum fieri volumus, qualiter nos Ottoni de Witilinesbac nostro fideli, qui nobis digne et laudabiliter servivit, consilio et hortatu principum nostrorum, Herimanni Augustensis episcopi, Ǒdelrici Eistetensis episcopi, Tibaldi marchionis, Engelberti marchionis, Berengarii comitis, Sigebodonis comitis aliorumque fidelium nostrorum, quoddam allodium Wilenbac nuncupatum, situm in comitatu Ottonis de Horeburc, in proprietatem dedimus et libere tenere atque possidere concessimus, cum omnibus appendiciis suis, videlicet villis, mancipiis utriusque sexus, pratis, pascuis, campis, silvis, venationibus, aquis aquarumve decursibus, piscationibus, molis, molendinis, viis et inviis, adquisitis et adquirendis, cum omni utilitate, quę inde exire vel provenire potest. In hac igitur itaque nostra largitione sive concessione statuimus statuendo nostra imperiali auctoritate sanccimus, ut nullus deinceps archiepiscopus, episcopus, dux, marchio, comes seu aliqua regni nostri magna parvaque persona predictum Ottonem de suprascripto allodio audeat inquietare, molestare vel disvestire. Si quis vero, quod non opinamur, contra hoc nostrum decretum aliquo temerario ausu ire temptaverit, auri optimi libras centum componat, medietatem scriniis nostris et medietatem prelibato Ottoni. Quod ut verius credatur et ab omnibus inviolatum permaneat, hanc cartam inde scriptam et manu propria corroboratam i[m]pressione nostri sigilli iussimus insigniri.

Signum domni Heinrici quarti Romanorum imperatoris invictissimi. (M.9.) (SI.D.)

Bruno cancellarius recognovit.

Data novemb., indictione VIIII, anno dominicę incarnationis millesimo C[XV], regnante Heinrico quinto rege Romanorum anno XII, imperante VII; actum est Rudesheim; in Christo feliciter amen.