H. cesar dei gratia Romanorum imperator augustus cunctis Italię principibus et civitatibus, maioribus et minoribus, gratiam et bonam voluntatem. Nosse volumus cunctos populos, quos clementię nostrę regit imperium, nostrę imperialis iussionis edictum, videlict nos velle et iubere eos per legum tramites incedere, pravorum hominum iniquitates expellere, quatenus nostri regni status assidue succrescat et victoria nobis a celesti numine prestita semper vigeat ac pace reddita cunctus in commune Romanus orbis gaudeat, ac per hoc imperiali auctoritate vobis precipiendo mandamus, ut unusquisque vestrum de finibus suis iniquitatem expellat, invasiones et iniurias corrigat, lites et iurgia sopiat et ęcclesias dei ante omnia veneranter summa cautela et tutela muniat, iudiciali arbitrio cuncta equa lance disponat. Hoc profecto sollerter exequentes nostrę pietatis mansuetudinem sentiunt, rebelles vero vel negligentes nostri examinis animadversionem incurrunt. Val(ete).