(C.) In nomine sanctae et individuae trinitatis. Heinricus divina favente clementia quartus Romanorum imperator augustus. Omnibus Christi nostrique fidelibus tam futuris quam presentibus notum fieri volumus, qualiter nos, ego videlicet Heinricvs IIIItus Romanorum imperator augustus, rogatu et petitione fidelium et principum nostrorum, Brvnonis videlicet Treuerensis archiepiscopi, Erlvngi Werceburgensis episcopi, Harthvici Ratisponensis episcopi, Adalberonis Metensis episcopi; ducum quoque: Frederici ducis, Lvtherii ducis, Bertholfi ducis, marchionis etiam Herimanni, Engelberti marchionis, Godefridi palatini comitis, hoc privilegium cuidam novę cellę Hertenowę dictę, in honore sanctę Marię et beatorum apostolorum Iohannis ęvangelistę et Bartholomei constructę, de novalis decima, quam archiepiscopus Brvno Treuerensis supradictę cellę dedit et perpetuo habendam contradidit, in quo novali eadem predicta cella sita est, de duabus etiam curtibus, quarum una vocatur Beię, altera Bvllingesheim, quas Herloldus et filius suus Bervicus eidem cellę pro salute animę suę dederunt, et prorsus de omnibus, quę iam adquisivit vel adquisitura est, fieri iussimus et sub pęna banni nostri firmiter interdicimus, ut nulla deinceps persona magna sive parva eandem ęcclesiam de beneficiis suis aliquomodo inquietare, molestare vel disvestire audeat. Si quis vero forte, quod absit, huius nostri precepti paginam infringere temptaverit, centum libras auri componat, medietatem camere nostre et medietatem supradictę ęcclesię. Ut autem hoc ab omnibus credatur et omni ęvo inviolabiliter observetur, hanc cartam inde conscriptam et manu propria corroboratam inpressione nostri sigilli insigniri iussimus.

Signum domni Heinrici quarti Romanorum imperatoris (M.9.) invictissimi. (SI.3.)

Bruno cancellarius recognovit.

Data XVI. kl. iulii, indictione VIII, anno dominicę incarnationis millesimo CXIIII, regnante Heinrico quinto rege Romanorum anno VIIII, imperante III; actum est Tollendorf; in Christo fęliciter amen.