(C.) In nomine sanctae et individuę trinitatis. Heinricus divina favente clementia quartus Romanorum imperator augustus. Omnibus Christi nostrique fidelibus tam futuris quam presentibus notum fieri volumus, qualiter nos, ego videlicet Heinricvs quartus Romanorum imperator augustus, interventu et iusta petitione fidelium et principum nostrorum, Bvrchardi Monasteriensis episcopi, Ottonis Bauembergensis episcopi, Reinardi Halberstatensis episcopi, Adalberonis Metensis episcopi, Herimanni etiam marchionis, Godefridi palatini comitis, Alberti comitis, Berengarii comitis de Sulcebac, traditionem, quam Ǒlricvs bonę memorię de Winmar ęcclesię Maguntinę per manum Hervini comitis de Turingia fecit, Dietmarum videlicet quendam et filium suum etiam Dietmarum nominatum et Timonem nepotem illius et Bertam etiam filiam supradicti Tietmari cum filiis et filiabus suis supradictę ęcclesię perpetuo iure habendos tradidit, nos quoque, ad quos allodia supradicti Ǒlrici communi iudicio principum nostrorum devenerunt, eandem traditionem laudamus et proprio privilegio confirmamus, hac videlicet conditione, ut nulla deinceps persona magna sive parva supradictos homines molestare vel inquietare audeat. Si vero forte, quod absit, aliquis huius nostrę concessionis paginam violare presumpserit, centum libras auri componat, medietatem camerę nostrę, medietatem supradictis hominibus. Ut autem hoc verum esse credatur et ab omnibus inviolabiliter conservetur, hanc cartam inde conscriptam et manu propria corroboratam impr[e]ssione nostri s[i]g[i]lli insigniri iussimus. Hoc etiam omnes scire volumus, quod supradicti homines cum eadem iusticia quam illi, qui theuthonice dienestman vocantur, supradictę ecclesię dati sunt.

Signum domni Heinrici quarti Romanorum imperatoris (M.7.) invictissimi. (SI.3.)

Bruno cancellarius recognovit.

Data XVIII. kl. maii, indictione VII, anno dominicę incarnationis millesimo CXIIII, regnante Heinrico quinto rege Romanorum anno VIIII, imperante IIII; actum est Warmacie; in Christo feliciter amen.