(C.) In nomine sancte et individue trinitatis. Heinricus divina favente clemencia quartus Romanorum imperator augustus. Patrum nostrorum ortodoxorum exempla secuti, qui ecclesias dei tam rebus ad fiscum regis pertinentibus quam propriis hereditatibus honoraverunt, pensantes quoque benignum remuneratorem deum preciosaque comercia, dum temporabilibus mercamur eterna, caducis in eternum mansura, nos eas in omnibus honorare [et] sublimare ad nostram perpetuam felicitatem desideramus. Quapropter omnium sancte dei ecclesie nostrorumque fidelium tam futurorum quam presencium noverit multitudo, qualiter nos ob remedium anime nostre, interventu quoque ac peticione fidelis nostri Burcardi Monasteriensis episcopi, Otonis Bauenbergensis episcopi, Heinrici ducis Carintie, Godefridi palatini comitis, Berengarii comitis, fideli nostro Taruisiensis ecclesie episcopo Gunboldo suisque successoribus ecclesieque illis comisse per hoc nostre institucionis preceptum felicis memorie patris nostri Heinrici consuetudinem eiusque predecessorum regum videlicet et imperatorum sequentes omnia predicte ecclesie precepta cunctaque empcionis, oblacionis seu cuiuscumque rate conquisicionis munimina eidem ecclesie a nostris predecessoribus constituta et corroborata et ea, que in illis continentur descripta: ecclesias scilicet et capellas, etiam sanctam Mariam cum castello Asylo et omnibus suis pertinenciis, ac monasterium Crispulinum seu abbaciam sancti Hylaris, Bladinum quoque et Ceresariam cum ecclesiastico districtu et decimacionibus, confirmamus et in perpetuum corroboramus; portum quoque Taruisiensem cum legitima aquarum riparumve districtione, monetam publicam, negociaciones mercatorum ceteraque omnia mobilia et inmobilia, que per preceptorum vel aliorum nominum cartarum instrumenta prefate ecclesie ab omnibus deum diligentibus vel timentibus collata et confirmata esse noscuntur, cum teloneis interius exteriusque colligendis, cum prediis et utriusque sexus mancipiis et familiis diversorum vocabulorum nominibus inscriptis. Insuper etiam ob fidelem devotamque servitutem Gunboldi eiusdem sedis episcopi plenum illud servicium, quod nos Verone inde debuimus accipere, in proprium dedimus atque tradidimus, ea videlicet racione, ut predictus Gunboldus episcopus suique successores nostris quoque nostrorum[que] successorum sive regum sive imperatorum temporibus soluti et omni modo liberi huius servicii exactione ac exibicione maneant et ad suam ipsius, quam voluerint, utilitatem idem servicium potestative convertant. Si autem inminente incendii vel alicuius infortunii periculo iamdicta ecclesia cartas vel aliquas inscripciones per negligenciam per[di]dit vel perdere quandoque contigerit, per hoc nostre confirmacionis preceptum corroboramus, ut ipsas res predicte ecclesie pontifex potestative teneat, ordinet atque disponat. Precipientes itaque iubemus, ut nullus dux, marchio, comes, vicecomes aut quisquam publicus exactor massarios, libellarios, cartularios, censatos, aldiones, servos et ancillas vel cuiuscumque generis homines super ipsius ecclesie terram residentes pignorare, calumpniari aut iniuste aliquid illis agere audeat neque ad placitum publicum eos venire compellat, sed, si quid contencionis supra illos invenitur, ante ipsius ecclesie episcopum diligenti iudicio finiatur omni[um] con[tra]dicione remota. Si quis igitur hanc nostre confirmacionis paginam infringere temerario ausu presumpserit, auri libras mille compositurum se noverit, medietatem camere nostre et medietatem predicte ecclesie suisque pontificibus. Quod ut verius credatur et diligencius ab omnibus observetur, manu propria roborantes sigilli nostri inpressione iussimus insigniri.

Signum domini Heinrici quarti Romanorum imperatoris invictis(M.9.)simi. (SMP.)

Burcardus cancellarius vice Frederici archicancellarii recognovit.

Data VIII. kl. februarii, indictione VII, anno dominice incarnacionis millesimo CXIIII, regnante Heinrico quarto rege Romanorum anno septimo, imperante III; act. est Varmacie; in Christo feliciter amen.