In nomine sancte et individue trinitatis. Henricus divina favente clemencia quartus Romanorum imperator augustus. Omnibus Christi nostrique fidelibus tam futuris quam presentibus notum fieri volumus, qualiter nos interventu et peticione nostrorum fidelium, Burchardi Monasteriensis episcopi, Ottonis Bauembergensis episcopi, Erlungi Werceburgensis episcopi, Godefridi palatini comitis et Berengarii comitis, Henricum et uxorem suam Adelasam, Marsilium, Hubertum et Hugolonem, germanos, Henrizonem, Litolfum et Gumbertum, germanos, cum uxoribus et heredibus illorum, quos vel quas habent vel habituri sunt, et specialiter castrum quod vocatur Carraria, cum omnibus allodiis et beneficiis, libellariis, precariis et cum omnibus rebus mobilibus et immobilibus, servis et ancillis, que nunc habent vel habituri sunt, insuper eciam monasterium sancti Stephani cum omnibus rebus, quas nunc habet vel in futurum acquirere poterit, in mundiburdii nostri tuicionem suscepimus, hac videlicet condicione, ut nullus marchio, comes vel vicecomes, scultacius vel vicedominus, gastaldus vel decanus, vel eciam ipse episcopus eos deinceps molestare, inquietare, disvestire vel ad placitum trahere usquam homines super bona eorum habitantes audeat vel aliquam publicam functionem facere. Et, ut molendina in fluminibus terris illorum adiacentibus licenter edificent, firmiter precipimus. Si quis autem huius nostri mundiburdii preceptum infregerit, sciat se compositurum mille libras purissimi auri, medietatem camere nostre, medietatem predictis hominibus eorumque heredibus. Ut autem hoc verum esse credatur et ab omnibus inviolabiliter conservetur, hanc cartam manu propria corroboratam impressione nostri sigilli insigniri iussimus.

Signum domini Henrici quarti Romanorum imperatoris invictissimi. (M.9.)

Burcardus cancellarius recognovit.

Dat. X. kal. februarii, indicione VII, anno dominice incarnacionis millesimo centesimo quartodecimo, regnante Henrico quarto rege Romanorum anno septimo, imperante secundo; actum est Warmacie; in Christo feliciter amen.