(C.) In nomine sanctae et individuae trinitatis. Heinricus divina favente clementia quartus Romanorum imperator augustus. Considerantes, quod conditio huius lubrici seculi brevis sit et incerta, statuimus in hac valle lacrimarum serere, quod in futuro cum gaudio sit metendum. Quapropter exemplo predecessorum nostrorum et precipue parentum nostrorum imperatorum, qui decorem ecclesię quamplurimum dilexerunt, cultum dei ampliandum, ubi et quantum possumus, decrevimus. Notum itaque facimus omnibus Christi nostrique fidelibus tam futuris quam presentibus, qualiter curiam Harnam, quam pater noster Heinricus beatę memorię tercius imperator ęcclesię sanctę dei genitricis Marię, quę est Aquisgrani, delegavit, eandem nos ammonitione et rogatu principum nostrorum et catholicorum virorum, videlicet Brvnonis Treuerensis archiepiscopi, Harthvici Ratisponensis episcopi, Ottonis Bauembergensis episcopi, Erlvngi Werceburgensis episcopi, Bvrchardi Monasteriensis episcopi, Arnoldi capellanarii nostri et predictę ęcclesię prepositi, Godefridi comitis de Caloen, Herimanni marchionis et aliorum multorum, delegamus cum omnibus appendiciis suis, scilicet mancipiis, advocatia, agris, pratis, pascuis, areis, silvis, venationibus, piscationibus, aquis aquarumve decursibus, molis, molendinis, viis et inviis, exitibus et reditibus, cum adquisitis et adquirendis, et delegando imperiali nostra auctoritate corroboramus et confirmamus, ea videlicet ratione, ut singulis annis in exequias (!) patris nostri Heinrici pii augusti ad refectionem fratrum libra una de supradicta curia persolvatur. Ut autem hoc ab omnibus credatur et omni tempore inviolabiliter observetur, hanc cartam inde conscriptam et manu propria corroboratam impressione nostri sigilli insigniri iussimus.

Signum domni Heinrici quarti Romanorum imperatoris invictissimi. (M.9.)

Bruno cancellarius recognovit. (SI.[3.])

Data II. kl. decembris, indictione Vta, anno dominicę incarnationis millesimo CXII, regnante Heinrico quinto rege Romanorum anno VI, imperante II; actum Warmacię; in Christo fęliciter amen.