In nomine sancte et individue trinitatis. Heinricus divina favente clementia quartus Romanorum imperator augustus. Noverit cunctorum fidelium sancte dei ecclesie nostrorumque presentium et futurorum scilicet industria, qualiter nos ob deprecationem venerabilis abbatis Ade monasterii Desertinensis et totius sue congregationis et ob interventum et rogatum principum nostrorum, archiepiscoporum videlicet: Vdalrici Aquilegiensis patriarche, Brunonis Treuerensis archiepiscopi, et episcoporum: Brunonis Spirensis, Burchardi Monasteriensis, Erlundi Wirzeburgensis, Friderici ducis, sicuti antecessores nostri imperatores, beate memorie avus noster imperator Heinricus et pater noster imperator Heinricus, sua imperiali auctoritate ius et libertatem predicte Desertinensis ecclesie confirmaverunt, ita nos nostra imperiali auctoritate eiusdem ecclesie ius et libertatem confirmamus, eo scilicet tenore, ut parentis nostri beate memorie Heinrici imperatoris ibidem perenniter maneat memoriale, ita ut nullus episcopus nullusque dux neque comes neque advocatus nullaque maior vel minor potestas aliquam omnino in predicta abbatia habeat potentiam nisi nos aut nostri successores, reges vel imperatores, quibus similiter ut nobis regende commendatur cura monarchie. Et ut hec nostra imperialis auctoritas stabilis et inconvulsa omni evo permaneat, hoc preceptum inde conscriptum manu propria corroborantes sigilli nostri impressione iussimus insigniri.

Signum domni Heinrici quarti Romanorum imperatoris invictissimi. (M.9.) (SMP.)

Arnoldus vice Alberti Maguntini archiepiscopi et archicancellarii recognovi.

Data II. non. octob., anno dominice incarnationis millesimo CXII, indictione V, regnante Heinrico quinto rege Romanorum anno VI, ordinationis eius XII, imperii II; actum est Spire; in Christo feliciter amen.