(C.) In nomine sancte et individue trinitatis. Heinricus divina favente clementia Romanorum imperator augustus. Noverit omnium fidelium nostrorum presentium scilicet et futurorum industria, qualiter fideles nostri Albertus scilicet Maguntine ecclesie venerabilis archiepiscopus, Adelgotus Magdeburgensis archiepiscopus pro rerum suarum mutua commutatione serenitatis nostre aures pulsaverunt. Quorum precibus benigne annuentes ex nostre auctoritatis licentia concessimus, quatinus ambo iuris sui res secundum placitum in bono invicem disponerent. Tunc idem Maguntinus archiepiscopus sue proprietatis locum Bennungin nominatum, in Turingia situm, cum aliis adnominatis predicto Magdeburgensi archiepiscopo per manum Erwini comitis cum omni integritate in perpetuum possidendum contradidit. Contra vero ab eodem Adelgoto curiam Wesela dictam, in pago Trechera, in comitatu Adelberti, tradente advocato suo Hermanno cum omnibus pertinentiis, Gugenheim, Huffelesheim, Treisa, in pago Nachgowe, in comitatu Emichonis, et ecclesia sancte Marie areisque infra muros civitatis, in comitatu Arnoldi, aliis quoque ecclesiis, edificiis, vinetis, terris, cultis et incultis, pratis, pascuis, campis, silvis, venationibus, aquis aquarumque decursibus, molis, molendinis, exitibus et reditibus, viis et inviis, quesitis et inquirendis, cum omnibus ad eadem loca pertinentibus per reconpensationem sine ullius contradictione perpetualiter tenenda atque possidenda nobis nostrisque fidelibus coram positis prefatus Maguntinus archiepiscopus in beati Martini proprietatem et suam recepit. Huius autem rei testes sunt: Bruno Treuerensis archiepiscopus, Otto Babenbergensis, Erlungus Herbipolensis, Reginhardus Haluerstadensis, Vdo Hildesheimensis, Heinricus Paterburnensis, Mazzo Fardensis, Theodericus Cicensis, episcopi, Fridericus palatinus comes, Hermannus comes, Dethi comes, Wicbertus comes, Sizzo comes, Heinricus comes, Hermannus comes, Erpho comes, Emicho comes et Gerlacus frater eius, Wernherus comes, Heinricus comes, Adelbertus comes, item Albertus comes, Erwinus comes; Meginhardus, Godefridus, Rabodo, Wittekindus, Hogerus, Burchardus, Gebezo et alii quamplures, qui ea, que viderunt et audierunt, vere testificari poterunt. Rogatu ergo Magdeburgensis archiepiscopi memorato archipresuli A. eiusque ecclesie Maguntine preceptum confirmationis fieri iussimus, per quod volumus firmiterque iubemus, ut deinceps liberam atque securam possidendi ea habeat potestatem. Et ut nostre concessionis auctoritas rata et inconvulsa omni permaneat evo, hanc cartam anuli nostri impressione insigniri iussimus et manu propria, ut subtus cernitur, corroboravimus.

Signum domini Heinrici invictissimi Romanorum quarti imperatoris augusti.

Dat. XVI. kal. iulii, anno dominice incarnationis MCXII, indictione V, anno XIII. ordinationis domini Heinrici V. regis Romanorum invictissimi, regni autem eius VI, imperii vero II; actum est Salzvvitele; feliciter in Christo amen.