In nomine sanctę et individuę trinitatis. Heinricus divina favente clementia quartus Romanorum imperator augustus. Noverit omnium sanctę dei ecclesię fidelium nostrorumque universitas, presentium scilicet ac futurorum, quod pro remedio animę patris nostri Heinrici tertii imperatoris, rogatu Scotigenarum necnon ob interventum principum nostrorum, Alberti Maguntiensis, Adelgosti Magdaburgensis, archiepiscoporum, et episcoporum, videlicet Ottonis Babenbergensis, Vdalrici Constantiensis, comitum quoque: Herimanni de Saxonia, Gotfridi de Caloen, Herimanni marchionis, et aliorum nostrorum fidelium in nostrum mundiburdium suscepimus tutelamque ecclesiam Ratisponę, quę iacet ante portam occidentalem, que Roselin porta dicitur, quam Otto, urbis prefectus Ratisponę, et alii quidam ex civibus eiusdem prenominatę civitatis, videlicet Matho, Vdalricus, Luduinus, Adelhardus et frater eius Anegast, Otto, Heinricus, Heselinus et filius suus Ruobertus, Balduuinus, Eggehardus, Ludwinus, Wizelinus, Engilbertus, Dietmarus, Engilscalcus, emerunt ab Adelhuno et filiis eius Vdelrico et Adelbuino, et predio illo, quod Monespach nominatur, dotavimus, assensu quoque Hartwigi venerabilis Ratisponensis episcopi, Friderici advocati, Ottonis comitis, Alberti comitis, Heinrici advocati, Mathonis et aliorum prelatorum eiusdem loci donantes eam sanctę Marię matri domini et sanctis apostolis dei Petro et Iacobo, sicut mos est sanctis tradi, sine omnium contradictione, quatenus in illorum honore deo ad serviendum ecclesiam ibidem construerent, quod et ita factum esse ab omnibus cernitur, eo siquidem tenore, ut eadem ecclesia in perpetuum libera permaneat nec ab aliqua persona magna vel parva ibidem deo famulantes graventur nec quicquam servitii nisi soli deo et sanctis eius alicui inde solvere cogantur. Si quis autem hanc libertatem infringere tentaverit, CCC libras auri compositurus banno nostro subiacebit, medietatem camerę nostrę et medietatem supradictę ecclesię. Quod ut verius credatur et ab omnibus observetur, impressione nostri sigilli iussimus insigniri.

Signum domini Heinrici quarti (M.8.) Romanorum imperatoris invictissimi. [SMP.]

Arnoldus vice Adelberti archiepiscopi et archicancellarii recognovi.

Data VII. kl. april., indictione IIII, anno dominicę incarnationis MCXI, anno ordinationis domini Heinrici regis Romanorum XI, regni autem eius VI, imperii vero primo; actum est Goslarię; in Christo feliciter amen.