In nomine sanctę et individuę trinitatis. Matheldis dei gratia Romanorum regina. Quę ęcclesiis et deo famulantibus conferuntur, conferentibus ad ęternam retributionem proficiunt. Hoc ego Matheldis considerans tradidi sancto Martino proprietatem, quę dicitur Richterko, cum omni utilitate et appendiciis, sicut dominus meus imperator et ego hereditaria possessione habuimus, sancto Martino in Traiecto pro remedio animę dilecti domini mei imperatoris Heinrici, cuius viscera ibidem sepulta sunt in tumulo, quo et atavi eius Conradi imperatoris intestina condita sunt, ad perpetuam memoriam eorundem imperatorum et meę peccatricis animę, ea conditione, ut perpetua observantia hęc inde exhibeantur: iugiter die ac nocte lumen cerę ad idem sepulchrum im medio choro permaneat; ęcclesiis canonicorum, scilicet beati Petri, sancti Iohannis, sanctę Marię, elemosina in anniversario dilecti domini mei imperatoris conferatur secundum arbitrium episcopi et priorum ęcclesię; et quicquid superfuerit, habeant canonici sancti Martini duas partes in eodem anniversario et terciam partem canonici sancti Bonifacii. Ut autem hęc traditio nostrę auctoritatis rata permaneat, hanc paginam inde conscriptam manu propria roborantes sigillo nostro insigniri iussimus.

Signum domni Heinrici quarti imperatoris invictissimi.

Philippus cancellarius vice Adelberti archicancellarii recognovi.

Data VII. kl. iun., anno domini MoCoXXVto, indictione III, anno autem domni Heinrici quinti regni quidem XXVI, imperii vero XV; actum est apud Wachoningon.