(C.) In nomine sanctae et individuae trinitatis. Heinricus divina favente clementia quartus Romanorum imperator augustus. Omnium sanctę dei ęcclesię nostrorumque fidelium noverit universitas, qualiter nos pro rem[e]dio animę nostrę, nostrorum parentum, regum et imperatorum, necnon interventu principum nostrorum, Ieremię Rauennatis archiepiscopi, Petri Foroliuiensis episcopi, Turingi Uincentini episcopi, Sigefridi Uercellensis episcopi, Arponis Feltrensis episcopi, Geb[har]di Tridentini episcopi, Ǒldelrici Constantiensis episcopi, abbatis Erlodi Wldensis, Warnerii marchionis, Anselmi marchionis, Alberti comitis de Martilingo, Maleuicini comitis aliorumque nostrorum fidelium, rogatu etiam Petri venerabilis [abbat]is suorumque confratrum ęcclesiam sancti Severi, et quicquid ad eamdem pertinet vel pertinere debet, sub mundiburdio nostrę tuitionis suscepimus. Concessimus etiam eis, quicquid antecessores nostri concesserunt et quę per precepta et privilegia eide[m ęcclesię] confirmaverunt, idest nostram dominicatam insulam a monasterio us[que] ad mare et a Badareno flumine usque ad Cambiani portum, scilicet tot[a]m [in]tegram cum piscationibus et pascuis, et di[midi]a[m] portam sancti Laurentii cum ripis fluminis et omnia mobilia et [inmobiles po]ssessiones et iura, que idem prefatum monasterium sancti Seue[ri hab]et in episcopatu Rauennati vel in comitatu Anconiense vel in [comitatu] Esii vel in Senegalia vel in Pesariense vel in Ariminensi vel in Ficoclensi vel Cesinensi vel Pup[uliensi vel L]iuiensi vel Fauentini vel Ymoliensi vel Bononiensi vel Ferrarie[n]si vel Comaclensi vel Gubiensi aut in comitatu Calensi vel Cast[ellanensi] Felicitatis vel Bobiensi vel in qualicumque loco nostri imperii obtinuerit. Volumus etiam et precipim[us predic]tum monasterium ab omni datione, functione, arbergaria, pedagaria et ripatico liberum esse et absolutum. Insuper vero [eidem] sancto loco concedimus, ut abhinc aldionis (!) seu aldiones sive quilibet residentes ad nullum pla[citum] vadant ad nullamque distrinctionem nisi in dominium et distrinctionem abbatis eiusdem monasterii, sed liceat abbatem et mon[achos] pro dei amore animęque nostrę remedio sub nostrę tuitionis protectione quiete vivere et deo famul[ari et] p[ro] nobis deum deprecari omnium hominum contradictione remota. Si quis ergo huius nostrę auctoritatis seu confirmationis preceptum quandoque [t]emerario ausu infringere temptaverit, sciat se compositurum auri obtimi libras centum, medieta[tem ca]merę nostrę et medietatem regentibus eiusdem venerabilem locum. Quod ut verius credatur diligentiusque ab omnibus observetur, manu propria roborantes presentem paginam nostro sigillo iussimus assigna[ri].

Signum domni Heinrici quarti Romanorum imperatoris invictissimi. (M.9.) (SI.3.)

Burchardus episcopus Monasteriensis et cancellarius recognovit.

Data III. non. ianuarii, indictione X, anno dominicę incarn[ationis MCX]VII, regnante Heinrico quinto rege Romanorum a[nno X, imper]ii VI; actum est Cortinę in archiepatu (!) Rauennati; in Christo feliciter amen.