Schillmann 759

G., episcopo Sabinensi, apostolice sedis legato.

Magna tue circumspectionis industria, que in altis et arduis quid expediat quidve deceat, longe lateque circumspicit, nos inducit ut tibi, in quo secure quiescimus, que grandis sunt admodum ponderis, committamus. Unde cum te, pro urgentibus et arduis negotiis, ad regnum Anglie, tam inibi quam etiam in Wallia et Ybernia commisso tibi plene legationis officio, destinemus, volentes ut eadem negotia eo utilius et efficacius prosequaris, quo majori per nos fueris auctoritate munitus, si aliqua tibi, circa ipsorum negotiorum prosecutionem, occurrant, que directionem seu promotionem eorundem respiciant et ad que ipsius legationis officium se forsitan non extendat, in hiis fraternitati tue, de cujus discretionis maturitate plene confidimus, committimus auctoritate presentium vices nostras. Datum apud Urbemveterem, X kalendas decembris, anno III°.