Schillmann 47

.., archidiacono de Blavia, Burdegalensis diocesis.

Porrecta nobis ex parte dilectorum filiorum .., abbatis et capituli secularis ecclesie sancti Asterii, Petragoricensis diocesis, petitio continebat, quod, cum Iterius Bertrandi, asserens se pauperem clericum ejusdem diocesis, nostras ad venerabilem fratrem nostrum .., Petragoricensem episcopum, super provisione sua in forma qua pro pauperibus clericis et scolaribus scribimus impetrasset litteras, inter alia continentes, ut eidem in sua civitate vel diocesi in aliqua ecclesiarum sibi subjectarum de beneficio provideret, .., cantor Albaterrensis ecclesie, Petragoricensis diocesis, cui super hoc dictus episcopus commiserat vices suas in predicta eorum ecclesia, in qua non ad dictum episcopum qui plurium beneficiorum collationem habere dinoscitur, sed ad eos dumtaxat prebendarum collatio pertinet, prefato clerico eis invitis providit, auctoritate hujusmodi litterarum, propter quod ipsi ad apostolicam duxerunt providentiam recurrendum. Cum igitur intentionis nostre, cum diocesanis in hujusmodi forma scribimus, non existat, quod de beneficiis ad non suam collationem spectantibus, nisi hoc expresse habeatur nostris litteris, valeant providere, mandamus quatenus, si in litteris, quas memorato episcopo super hoc dicimur direxisse, quod de beneficio ad cujuscumque collationem spectante ipsi clerico providere expressius non habetur, processibus super hoc habitis revocatis, prefatos .., abbatem, et capitulum ab eadem provisione prorsus absolvens, dictum clericum ab ipsorum super hoc molestatione, monitione premissa, per censuram ecclesiasticam, appellatione remota compescas. Dat. Anagnie, III nonas octobris, anno primo.