Schillmann 387

Venerabili fratri Johanni electo Tyrensi, episcopo quondam Sydoniensi.

Ad providam sedis – Sane Tyrensi ecclesia per obitum bone memorie Egidii, archiepiscopi Tyrensis, in cismarinis partibus decedentis, pastoris solatio destituta, nos qui ecclesiarum omnium susceptam sollicitudinem juxta pastoralem officium utiliter gerere quantum superna ministrat gratia cupimus, in tempore intendentes prospicere, ut ipsius regimini ecclesie, quam licet longe positam interne mentis contemplamur oculis, persona secundum cor nostrum ydonea preferretur, provisionem ejusdem Tyrensis ecclesie, fratribus nostris presentibus, nobis specialiter explicite reservavimus et expresse, ac decrevimus ex tunc inane prorsus ac irritum si secus attemptari quomodolibet contingeret sive agi; et ut beneplacitum super hoc apostolicum illis quorum intererat certius foret notum, ad venerabilem fratrem nostrum .. patriarcham Jerosolimitanum, in illis partibus apostolice sedis legatum, nostre nichilominus emanarunt littere continentes, ut ex parte nostra capitulo prefate Tyrensis ecclesie inhiberet, ne ad electionem, postulationem sive nominationem aliquam de archiepiscopo ea vice procederent, absque prelibate sedis licentia speciali. Verum antequam ad eumdem patriarcham ipse littere pervenirent, post factam tamen reservationem ac interpositum decretum hujusmodi, memorati capitulum, predicta ejusdem sedis licentia non obtenta, Ottobonum, archidiaconum ipsius ecclesie, in suum archiepiscopum, ut asseritur, elegerunt; cujus electionem presentatam sibi nominatus patriarcha dicitur confirmasse. Nos autem videntes, ac evidentius cognoscentes, electionem et confirmationem hujusmodi, utpote contra reservationem et decretum predicta factas, aliquatenus non valere, nec ab initio etiam valuisse, illas cassamus, annullamus et irritamus, immo cassas, nullas et irritas nuntiamus. Declarantes preterea prefatum Ottobonum, hujusmodi electionis celebrate de ipso et subsecute postea confirmationis prefate pretextu, de administrando in dicta ecclesia spiritualiter vel temporaliter se non potuisse nec posse intromittere vel debere, cui ne id presumat agere districtius inhibemus; ipsum insuper ad eorum que ratione administrationis spiritualium et temporalium ipsius ecclesie, quam aliquandiu gessisse dicitur hoc pretextu, percepta sunt ab eo, vel alio seu aliis pro ipso, restitutionem teneri plenariam decernentes. Rursum precavere volentes, ne ipsa ecclesia viduitatis prolixioris deploret incommodum, in suum quod exinde posset incurrere multiplex nocumentum, de utili ministro illi celeriter providimus consulendum. Advertentes igitur virtutes varias et immensas divinitus tibi traditas, quibus per opera utilia et exempla laudabilia vehementer fructuosus redderis, et supra majora mereris constitui, qui circa minora, tue magne studio ac exercitio probitatis feliciter gubernata, te bene ac commendabiliter habuisti; te, olim Sydoniensem episcopum, quem sincera in Domino caritate diligimus, et ad gubernandum ecclesiam ipsam perutilem reputamus, a vinculo quo Sydoniensi ecclesie tenebaris absolvimus, et ad predictam Tyrensem ecclesiam transferentes, illi de fratrum nostrorum consilio et apostolice potestatis plenitudine in archiepiscopum prefecimus et pastorem. – Dat. Viterbii, XV kalendas octobris, anno tertio.

In e. m. capitulo Tyrensi mandate ut eidem Johanni tanquam archiepiscopo pareant. Dat. ut supra.

In e. m. clero civitatis et diocesis Tyrensium.

In e. m. suffraganeis ecclesie Tyrensis. Dat. ut supra.

In e. m. populo civitatis et diocesis Tyrensium. Dat. ut supra.

In e. m. vassallis ecclesie Tyrensis. Dat. ut supra.