Schillmann 1906

Eidem.

Pravorum molestiis eum vexari non convenit qui Crucifixi servitio se crucis assumpto signaculo deputavit, quia graviter humani generis Redemptor offenditur cum ab ejus obsequio humilium animi superborum vexationibus retrahuntur. Ideoque apostolice defensionis illos scuto protegimus quos ad Terre Sancte subsidium invitamus, ut eo se quilibet dominicos libentius constituant famulos, quo se magis ab iniquorum senserint incursibus expeditos. Hinc est quod nos ad instar felicis recordationis Gr[egorii] pape predecessoris nostri personas et bona crucesignatorum ex quo crucem assumpserunt sub Beati Petri et nostra protectione suscipimus, statuentes ut, donec de ipsorum reditu vel obitu certissime cognoscatur, integra maneant et quieta, necnon sub archiepiscoporum, episcoporum et omnium prelatorum Ecclesie Dei defensione consistant. Verum quia nonnulli, timorem Dei ante oculos non habentes, crucesignatorum bona per violentiam rapere et personas eorum injuriis afficere non verentur, et indignum est ipsorum pium et sanctum propositum aliquorum presumptionibus impediri, mandamus quatinus universos crucesignatos et alios qui susceperunt signum crucis protegens ab inquietationibus iniquorum, non permittas crucesignatos eosdem ab aliquibus contra protectionis et constitutionis nostre tenorem indebite molestari, molestatores hujusmodi per censuram ecclesiasticam appellatione postposita compescendo. Ceterum si qui crucesignatorum ad prestendas usuras juramento teneantur astricti, aut si quisquam creditorum eos ad solutionem coegerit usurarum, creditores ipsos ut remittant eis prestitum juramentum et ab usurarum exactione desistant, ac restituant sic extorta, simili censura compellas, Judeos ad remittendum usuras per subtractionem communionis fidelium nichilominus compellens. Hii vero qui Judeis debita solvere nequeunt in presenti usquequo de ipsorum reditu vel obitu certissime cognoscatur usurarum incommoda non incurrant, compulsis Judeis proventus pignorum quos interim ipsi percipient in sortem deductis expensis necessariis computare. Ad hec, quia crucesignati non solum suam salutem prosequi, sed pro Christianorum omnium noscuntur commodo laborare, nos, quietem eorum quantum cum Deo possumus procurantes, volumus et mandamus ut eosdem ad judices extraordinarios seu etiam a Sede Apostolica delegatos in causam trahi nullatenus patiaris, quamdiu coram ordinariis et diocesanis suis parati fuerint de se conquerentibus justitiam exhibere; contradictores, [etc.] Dat. ut supra.