Schillmann 2526

.., magistro et fratribus domus Militie Templi Jerosolimitani.

Ipsa nos cogit pietas honestis petitionibus vestris exauditionis gratiam non negare quibus efficax ex eo favoris patrocinium suffragatur quod pastorem alium preter Romanum pontificem non habentes pro Terre Sancte tutela, cui perpetuum religionis vestre obsequium dedicastis in fervore caritatis intrepide sub devota Sedis apostolice obedientia prudenter exponitis contra impetus infidelium res et vitam. Hoc jam manifeste probavit frequens fratrum vestrorum et innumerosus occubitur qui gloriosa et in conspectu Domini morte per quam additus vite patet de crucis Christi hostibus hactenus triumphavit. Hoc nunc clamat in auribus omnium illud pro dolor! sacri sanguinis profluvium copiosum, quo precedentibus annis in illis partibus laverunt de modernis fratribus vestris quamplurimi stolas suas. Super quibus nimirum et aliis Christi fidelibus quos idem casus enexit ad palmam percussa vehementer in vobis jaculo intime compassionis humanitas ingenite gravitatis paulisper laxato rigore super reffluentem palpebris Ecclesie Romane fontem aperuit lacrimarum, licet ad consolationem invitet exultationis festive gaudium quod de ipsis in exterminabili procul dubio pace fruentibus coram Deo ducitur in excelsis. Vestris igitur precibus liberaliter annuentes, ad instar felicis recordationis I. pape predecessoris nostri, devotioni vestre auctoritate presentium indulgemus, ut per gratias et indulgentias seu litteras quaslibet quibuscumque ecclesiis aut ecclesiasticis secularibusve personis sub quacumque forma verborum a Sede apostolica concedendas, mentionem non facientes de domo vestra subjectisque sibi domibus et fratribus earumdem ac ordine vestro vobis vel ipsis nullum prejudicium generetur nec gratie, indulgentie ac littere hujusmodi ad dictarum domorum et ipsorum fratrum dispendium aliquatenus extendatur. Presentibus post quinquennium etc. Nulli etc. nostre concessionis etc.Dat. ut supra.