Schillmann 3444

Processus habitus contra Veronenses, L. ducem Bawarie et quosdam alios, eodem die et anno. Ad certitudinem, etc., ut supra.

Nuper in die Cene Domini proxime preterito, fidelium multitudine copiosa presente, .. potestatem, .. capitaneum, consiliarios et singulos officiales civitatis Veronensis pro eo quod olim Conradino, quondam Fr[ederici], dudum Romanorum imperatoris nepoti, contra inhibitiones felicis recordationis C. pape, predecessoris nostri, favorem, consilium, et auxilium multipliciter impendentes, ipsum cum gente sua in ipsa civitate ausu temerario receperunt, necnon L. ducem Bawarie, .. comitem Tyroli, Fredericum, carissimi in Christo filii nostri, .. illustris regis Castelle, germanum, Guidonem Novelli, Fredericum Lancea, Bosum de Dovaria, Manfredum Malet, qui se comitem camerarium nominabat, et Conradum Trinza pro eo quod nominato Conradino contra inhibitiones predictas presumpserunt assistere ipsumque fovere, latas ab eodem predecessore contra prefati Conradini fautores, ac in ipsos specialiter excommunicationis, et in terras ipsorum interdicti sententias necnon et penas in processibus ipsius predecessoris adjectas, prout plenius declarat eorum series, denuntiavimus incurrisse. Et nichilominus ipsos monuimus ut infra kalendas instantis mensis septembris, quas eis pro peremptorio termino duximus assignandas, humiliter ad nostra et ipsius ecclesie mandata redirent precise, nostris et ipsius ecclesie beneplacitis parituri, et satisfactionem de suis excessibus plenariam impensuri. Alioquin contra eos gravius spiritualiter et temporaliter, prout foret expediens, procedere curaremus. Nostrum itaque processum hujusmodi prosequentes, memoratos potestatem, capitaneum, consiliarios, officiales, necnon ducem, comitem Tyroli, Fredericum, ejusdem regis Castelle germanum, Guidonem Novelli, Fredericum Lancea, Bosum de Dovaria, Manfredum Malet, Conradum Trinza et terras predictas denuntiamus eisdem penis et sententiis fore subjectos. Et iterato ipsos, hac fidelium multitudine presente, monemus ut infra easdem kalendas, eis pro peremptorio termino assignatas, etc., ut in tertia superiori, usque publicabunt. Ita quod iidem potestas, capitaneus, consiliarii, et singuli officiales civitatis Veronensis necnon dux, comes Tyroli, Fredericus, carissimi in Christo filii nostri .. regis Castelle germanus, Guido Novelli, Fredericus Lancea, Bosus de Dovaria, Manfredus Malet, Conradus Trinza et alii quos processus ipse contingit, etc., usque in finem.