Schillmann 3441

Processus contra Perusinos, Spoletanos et alios suos complices.

Martinus, etc. Ad certitudinem presentium et memoriam futurorum. Propter graves et multiplices excessus perpetratos et continuatos diutius in nostrum et Ecclesie Romane contemptum, per potestates, capitaneos, consiliarios et communia Perusine, Spoletane, Asisinatis et Nucerine civitatum, ac de Spello, de Gualdo Nucerie et de Mevania castrorum, Spoletane diocesis, contra dilectos filios .. potestatem, .. capitaneum, consilium et commune Fuliginates ac bona ipsorum, in die Cene Domini proximo preterito et aliis diversis retrotemporibus contra potestates, capitaneos, consiliarios et communia ipsa, necnon et contra alios ipsorum occasione, ac etiam contra adherentes et dantes eis auxilium, consilium vel favorem publicum vel occultum, post diversa monitiones, inhibitiones, comminationes et precepta, dampnabiliter contempta per ipsos, excessibus et contumatia exigentibus eorundem, excommunicationis et interdicti sententias varias promulgavimus, penas indiximus et alios diversos et varios processus fecimus, justitia suadente, sicut in processibus per nos habitis super hoc et sollempniter publicatis plenius continetur. Que quidem omnia et singula in processibus ipsis expressa tanquam nominatim et singulariter repetita ratificantes et approbantes, rata et firma manere, ac plenum robur firmitatis obtinere volentes, ac in omnes et singulares personas excommunicationis, in civitates vero et castra predicta, interdicti sententias ex causis eisdem et propter pertinacem ipsorum auctam contumatiam in non parendo nostris monitionibus, inhibitionibus et preceptis ac a nobis prohibita continuando diutius, de fratrum nostrorum consilio promulgantes, nichilominus, quia per continuationem et multiplicationem excessuum crevit postmodum pertinatia eorundem, ut aucte ipsorum contumatie accumulatio pene non desit eis omnibus, Perusinis, videlicet sub duodecim milium, Spoletanis sub totidem, Asisinatibus sub decem milium, Nucerinis sub quinque milium, aliis vero de Spello, de Gualdo et de Mevania sub totidem, videlicet quinque milium marcharum argenti penis, de novo districte precipimus, ut ab hostili impugnatione Fuliginatum eorundem abstinentes omnino, eisdem potestati, capitaneo, consilio et communi Fuliginatibus, de illatis dampnis et injuriis satisfactionem plenariam exhibere, ac nichilominus infra festum beatorum apostolorum Petri et Pauli ad nostra et ipsius Ecclesie mandata redire procurent. Quod si ab impugnatione hujusmodi abstinere et ad nostra et Ecclesie predicte mandata, ut predicitur, redire contempserint, nos aliis penis hactenus indictis eisdem et sententiis latis, ac processibus habitis contra eos ratis omnino manentibus, eosdem potestates, capitaneos, consiliarios et communia et eorum quoslibet, in sua pertinatia permanentes, penas in presenti processu contentas ex tunc incurrere decernimus ipso facto; alias contra eos spiritualiter et temporaliter prout expedire viderimus, actore Domino, processuri. Ut autem hujusmodi noster processus, etc. usque in fine.