Schillmann 3340

.. abbati et conventui monasterii de Lundors, ordinis Sancti Benedicti, Sancti Andree diocesis.

Cum a nobis ... Sane petitio vestra nobis exhibita continebat quod quondam Rogerus de Quenci, comes Wyntonie, constabularius Scotie, jus patronatus ecclesie de Cullessy, Sancti Andree diocesis, tunc ad ipsum pertinens, vobis et monasterio vestro, dum viveret, de consensu bone memorie Gamelini, episcopi Sancti Andree, loci diocesani, liberaliter contulit intuitu pietatis, ac idem episcopus de assensu capituli sui vobis eandem ecclesiam in proprios usus ordinaria auctoritate concessit, ita quod, cedente vel decedente ipsius ecclesie rectore, qui tunc vivebat, ejusdem ecclesie possessionem ingredi libere possetis, alicujus assensu minime requisito, vicario perpetuo in dicta ecclesia servituro portione congrua de ipsius ecclesie proventibus reservata, ex qua comode sustentari posset, ac incumbentia sibi onera supportare, prout in patentibus litteris inde confectis comitis et episcopi ac capituli predictorum sigillis munitis plenius dicitur contineri. Vosque postmodum dictam ecclesiam per cessionem prefati rectoris vacantem juxta concessionem hujusmodi in predictos usus habentes, ipsam in usus eosdem canonice retinetis, vicario per vos, ut premittitur, servituro in eadem ecclesia constituto, sibique de ipsius ecclesie proventibus portione congrua assignata. Nos itaque vestris supplicationibus inclinati, quod super premissis provide factum est ratum et firmum habentes, id auctoritate apostolica confirmamus et presentis scripti patrocinio communimus ... Dat. Rome apud Sanctam Mariam Majorem, idus (sic) decembris, anno primo.