Schillmann 3312

Nicolaus etc., ad certitudinem presentium et memoriam futurorum.

Nuper nobis fide digna relatio patefecit quod iniquitatis filii Guido de Montefeltro, Bonuscomes, natus, et Galasius, consanguineus ejus, ac Raynerius dictus Pazus, preteritis contra romanam ecclesiam commissis excessibus non contenti, ac, exigentibus gravissimis culpis suis, vinculo excommunicationis astricti, se ad nonnulla civitates et castra provintie Tuscie ac aliarum vicinarum partium conferunt, adversus statum ecclesie suorumque fidelium turbationes et scandala temerariis ausibus machinantes. Nolentes itaque talia equanimiter sustinere, universos archiepiscopos, episcopos et prelatos alios ecclesiarum, cujuscumque status, dignitatis et conditionis existant, ac etiam potestates, capitaneos, consiliarios et communitates civitatum et castrorum ipsorum, presente hac fidelium multitudine copiosa, monemus ut predictos Guidonem, Bonumcomitem, Galasium et Raynerium de civitatibus, castris seu terris suis et eorum jurisdictioni seu potestati subjectis, sublato more dispendio, prorsus expellant, eos ulterius, presertim ad aliqua officia publica, minime recepturi. Alioquin contra eos et civitates, castra et terras ipsorum spiritualiter et temporaliter, prout qualitas facti suaserit, eorum contumatia exegerit et expedire viderimus, auctore Domino, procedemus. Ut autem hujusmodi noster processus etc., usque publicabunt. Ita quod iidem Guido et alii quos processus ipse contingit etc., usque in fine.