Schillmann 3301

Ad perpetuam rei memoriam.

Herbipolensi ecclesia destituta pastore, due in ea electiones, una videlicet de Boppone preposito et alia de Bertoldo de Hennemberch, canonico ejusdem ecclesie, fuerunt in discordia celebrate. Presentatis igitur electionibus hujusmodi venerabili fratri nostro .. Maguntino archiepiscopo, loci metropolitano, et utraque parte suam electionem ab eo petente confirmari, et reliquam infirmari, litis contestatione habita in negotio hujusmodi, factis quoque hinc inde positionibus et responsionibus ad easdem, idem prepositus et pars que ipsum elegerat, ab eodem archiepiscopo asserentes ex causis variis indebite se gravari, ad sedem apostolicam appellarunt. At predictus archiepiscopus, hujusmodi appellatione contempta, electionem celebratam de dicto Bertoldo pro sua voluntate confirmans, eumdem Bertoldum ordinavit in presbyterum et in episcopum consecravit. Sane procurator dicti prepositi ac ejusdem partis, que ipsum elegerat, juxta constitutionem felicis recordationis Innocentii pape, predecessoris nostri, super hoc editam, propter hoc ad sedem ipsam accedens, a nobis cum instantia postulavit, ut quicquid circa eumdem Bertoldum post appellationem predictam per eumdem archiepiscopum factum extitit cassaremus et irritaremus, immo denuntiaremus cassum et irritum, ac nullius existere firmitatis. Porro nos dilecto filio magistro Petro Rostandi, capellano nostro et palatii nostri generali auditori causarum, commisimus ut audiret que dictus procurator vellet proponere coram eo. Idem autem capellanus partem adversam in audientia publica pluries et peremptorie citari faciens, eam post terminum in constitutione ipsa statutum diutius expectavit. Cumque pro dicta parte nullus compareret coram eo legitimus procurator, ipse illa que dictus procurator predictorum prepositi et partis que ipsum elegerat proponere voluit coram eo diligenter audiens, ea postmodum in fratrum nostrorum presentia fideliter retulit coram nobis. Nosque illis plene discussis, cum aperte liqueret hujusmodi negotium fore per appellationem predictam ad eamdem sedem legitime devolutum, et apud eam tractari debere, memorato procuratore pro parte sua ipsum prosequente negotium, in eo, exigente prefate partis alterius contumacia, procedentes, quia invenimus quod idem archiepiscopus, post appellationem predictam, per quam dictum negotium erat ad eamdem sedem legitime devolutum, prefatam electionem celebratam de dicto Bertoldo, de facto, cum jamdictum negotium a jurisdictione sua omnino foret exemptum, confirmaverat, et eidem B. munus consecrationis impenderat, citata predicta parte ipsius Bertoldi in audientia publica de mandato nostro peremptorie ad diffinitivam sententiam audiendam, et ea absente per contumaciam, de ipsorum fratrum consilio, confirmationem electionis predicte celebrate de dicto Bertoldo, post predictam appellationem, a prefato archiepiscopo, ut premittitur, attemptatam, et quicquid idem Bertoldus pretextu confirmationis hujusmodi pontificalis officii ratione presumpsit, seu velut Herbipolensis episcopus attemptavit, denuntiamus cassa et irrita, et nullius esse firmitatis, et nichilominus quatinus de facto processerunt, cassamus et etiam irritamus, decernentes per cassationem, irritationem et denuntiationem hujusmodi prefato Bertoldo in jure, si quod ei ex predicta de ipso celebrata electione quesitum fuit, nullum prejudicium generari, sed, ipsis non obstantibus, illud in eo statu in quo tempore predicte appellationis emisse fuerat nichilominus remanere. Nulli ergo nostre denuntiationis, cassationis, irritationis et constitutionis, etc. Dat. Viterbii, IX kalendas junii, anno quarto.