Schillmann 3297

Ad perpetuam rei memoriam.

Metensi ecclesie pastoris solatio destituta, et duabus electionibus, una videlicet de Phylippo, tunc thesaurario, et alia de quondam Theobaldo, cantore ipsius ecclesie, in discordia inibi celebratis, idem Phylippus ac Werricus, archidiaconus, et Albericus, canonicus ejusdem ecclesie, ipsius Phylippi electores, occasione hujusmodi electionum, ad sedem apostolicam appellarunt, ac felicis recordationis Alexander papa, predecessor noster, hujusmodi sibi appellationibus presentatis, dilectum filium nostrum O[ctavianum], s. Marie in Via lata diaconum cardinalem, deputavit in hujusmodi negotio auditorem. Qui eundem cantorem et omnes alios qui dicti Phylippi electioni se vellent opponere, et sua crederent interesse, in audientia publica pluries citari fecit, ut coram se ac prefixis sibi terminis comparerent. Porro, predicto negotio taliter ad sedem ipsam devoluto, et coram dicto cardinali pendente, Henricus, electus Treverensis, loci metropolitanus, auctoritate propria, immo temeritate potius, Phylippum et cantorem predictos super eodem negotio ad suam presentiam evocavit. Et tandem, licet sibi de dictis appellationibus constitisset, sicut per acta coram ipso habita, probatum extitit coram nobis, ipse tamen eidem sedi non deferens, dicto cantore juri suo cedente, dictam electionem celebratam de prefato Phylippo, de facto, cum de jure nequiverit, confirmavit et ei fecit munus consecrationis impendi. Verum, dilectus filius Herbertus de Vireio, canonicus Metensis, qui pro dicto cantore ac suis electoribus contra dictum Phylippum predictum negotium apud sedem prosequebatur eandem, audito quod prefatus cantor juri suo cesserat, causam, quam contra dictum Phylippum pro eodem cantore ac suis electoribus assumpserat, nomine suo, tamquam canonicus Metensis, incepit coram cardinali prosequi supradicto, petens per varios libellos confirmationem hujusmodi, et quicquid per dictum electum super hoc taliter attemptatum fuerat, utpote post appellationes predictas, et coram dicto cardinali negotio ipso pendente, de facto presumpta, cassari et irritari, immo potius cassa et irrita nuntiari. Eodem itaque coram memorato cardinali legitime ordinato et examinato negotio, ac omnibus rite peractis, nos, audita ipsius cardinalis relatione fideli et cum fratribus nostris negotio ipso plene discusso, quia tam per ea que coram cardinali eodem, quam per illa que acta sunt postmodum coram nobis de predictis appellationibus, constitit evidenter quod post ipsas appellationes memorato predecessori presentatas, et super ipsis auditorem deputatum ab eo, necnon et diversas citationes ab eodem auditore factas, sicque postquam sepefatum negotium erat ab examine dicti Treverensis electi prorsus exemptum, et apud sedem ipsam coram eodem auditore pendebat, idem electus electionem de dicto Phylippo celebratam, confirmare presumpsit, et ipsum fecit temerarie consecrari, confirmationem hujusmodi et omnem memorati Treverensis electi processum, in hac parte taliter attemptatum, de predictorum fratrum nostrorum consilio, sententiando cassamus, annullamus, irritamus, immo cassos, nullos et irritos nuntiamus, declarantes memorato Phylippo uti pontificalibus vel exercere pontificale officium aut administrationem predicte Metensis ecclesie in spiritualibus vel temporalibus gerere non licere, et ne predicta exequatur eidem sententialiter inhibemus. Nulli ergo nostre cassationis, annullationis, irritationis, nuntiationis, declarationis et inhibitionis etc. Datum apud Urbemveterem, VIII kalendas octobris, anno tertio.