Schillmann 3296

Eidem.

Ex parte karissimi in Christo filii nostri .. Portugalie regis illustris fuit nobis per dilectum filium magistrum Thomam, thesaurarium Bracharensem, capellanum nostrum, et fratrem Alfonsum de ordine Hospitalis sancti Johannis, ejusdem regis procuratores et nuntios, humiliter supplicatum, ut interdicti sententias quas venerabiles fratres nostri Martinus, archiepiscopus Bracharensis, bone memorie E. Compostellanus, tunc Colimbriensis, M. Colimbriensis, tunc Visensis, P. Lamecensis, V. Portugalensis, et bone memorie M. Elborensis et R. Egitaniensis episcopi in suas civitates et dioceses, et venerabilis frater noster .. Tudensis episcopus in quadam parte sue diocesis regni Portugalie auctoritate ordinaria tulerunt, faceremus de benignitate apostolica relaxari; presertim cum post appellationem ad sedem apostolicam legitime interjectam fuerunt promulgate; predictis archiepiscopo, M. Colimbriensi et V. Portugalensi episcopis, in nostra presentia constitutis, proponentibus ex adverso, quod hujusmodi sententie propter manifesta gravamina seu offensas late fuerant, sicque nisi satisfactione premissa relaxari de jure non poterant nec debebant. Sane nos prefati regis, quem inter alios mundi principes sincere caritatis in Domino brachiis amplexamur, regni, archiepiscopi et episcoporum predictorum, ac ecclesiarum regni ejusdem statum tranquillum et prosperum affectantes, ac volentes hujusmodi negotium, omissis litigiorum anfractibus, per quos multa dispendia possent partes incurrere, per viam compendii eisdem partibus utilem terminari, pro bono pacis sententias hujusmodi usque ad sex mensium spatium suspendentes, te, de cujus circumspectione plene confidimus, pro hujusmodi negotio ad partes illas deliberavimus specialiter destinandum. Quocirca mandamus quatinus personaliter ad predictum regnum accedens, recepta prius pro archiepiscopo [et] episcopis predictis, ac prosecutoribus hujusmodi negotii, religiosis et clericis, eorumque familiis, ipsorumque nomine, a dicto rege assecuratione, ac per eumdem regem tibi pro parte archiepiscopi et episcoporum ipsorum, rancoris, si quem contra ipsos conceperat, remissione facta, juxta formam quam tibi sub bulla nostra tradi jussimus interclusam, sententias predictas, quas ex tunc relaxamus, auctoritate nostra denuntians ac per alios denuntiari faciens in locis in quibus expedire videris relaxatas, si gravamina contenta in articulis quos tibi sub eadem bulla fecimus assignari inveneris esse notoria, vel si tibi per inquisitionem a te super hiis et super dicti regis defensionibus ex officio tuo, auctoritate nostra, de plano et sine strepitu ac figura judicii, faciendam, ea vel ex ipsis aliqua constiterit esse vera, et regem ipsum suis defensionibus non juvari, eumdem regem moneas, ut super illis de quorum taliter veritate constabit, satisfactionem plenariam a te injungendam eidem exhibeat et faciat exhiberi. Caveat insuper quod ab ecclesiarum, prelatorum ac aliarum personarum ecclesiasticarum hujusmodi gravaminibus, injuriis et molestiis abstinebit, et suos faciat abstinere, promittens firmiter per suas patentes litteras sub bulla plumbea dictis archiepiscopo et singulis episcopis concedendas, quod deinceps ab hujusmodi gravaminibus et molestiis se ac suos penitus cohibebit. Quod si prefatus rex monitis tuis parere in hac parte contempserit, tu non solum predictas civitates et dioceses, verum etiam idem regnum Portugalie, auctoritate predicta supponas ecclesiastico interdicto. Contradictores – Testes autem – Non obstante – Nobis nichilominus, tam super gravaminibus que, ut premittitur, notoria seu vera inveneris, quam super ipsius regis inobedientia, rescripturus protinus et plenius veritatem, ut per nos diligentius facti qualitate pensata, responsi nostri serie, quod te interim prestolari volumus, celeriter instruaris qualiter sit contra ipsum regem ulterius procedendum. Idem siquidem rex ignorare non debet, quod cum nos debitum cogat officii magnum judicare ut parvum, quantumcunque libenter ipsius excellentie deferamus, tamen ei contra Deum et justitiam deferre non proponimus, nec deferemus proculdubio, quominus contra ipsum, prout exegerit inobedientie sue qualitas, et expedire viderimus, procedamus. Ceterum si de predictis gravaminibus adeo pauca et levia vera esse compereris, quod contra dictum regem aut regnum tibi videatur mitius procedendum, tu vel id ad nostram conscientiam referas, vel processum hujusmodi, prout expedire putaveris, modereris. Porro per ea que statueris aut decreveris in premissis nullum volumus fieri prejudicium ordinationi felicis recordationis G. pape, predecessoris nostri, nec hiis ad que rex idem est juramento astrictus, sed ea universa et singula, prout ad ea servanda tenetur, in sua maneant firmitate. Dat. Viterbii, II kalendas augusti, anno quarto.