Schillmann 3293

.. episcopo Suessionensi et magistris Nicolao Landunensi et Radulpho in ecclesia Suessionensi de Riparia archidiaconis.

Ecclesia Cathalaunensis per obitum bone memorie Cononis, episcopi Cathalaunensis, pastoris solatio destituta, convenientibus vigintiquatuor ipsius Ecclesie canonicis ad electionem de substituendo episcopo celebrandam, contigit, sicut fertur, in ea duas electiones successive per intervallum temporis, unam videlicet primo a novem de quondam magistro Guarino archidiacono, reliquam vero postmodum a duodecim, duobus aliis consentientibus ut ipsi procederent, sed nolentibus interesse processui, de dilecto filio Arnaldo, capellano nostro, preposito Coloniensi, canonico ejusdem ecclesie, in discordia celebrari. Negotio itaque hujusmodi per appellationem ad sedem apostolicam devoluto, et dicto archidiacono viam universe carnis ingresso, ac dilectis filiis magistris Henrico de Lermit et Marco de Viterbio, procuratoribus quorundam ipsum prepositum eligentium, absque contradictore aliquo comparentibus in publico, electionem de ipso celebratam confirmari cum instantia postulantibus, nos examinationem electionis ejusdem, ac ipsius prepositi venerabili fratri .. episcopo Tusculano et dilectis filiis nostris G[uillelmo], tituli sancti Marci presbitero, et R[iccardo] sancti Angeli, ac deinde, ipso absente, O[ttobono] sancti Adriani diaconis cardinalibus duximus committendam, quibus hujusmodi examinationi electionis predicte vacantibus, licet dilectus filius Sinibaldus, canonicus Cathalaunensis, procurator eorum qui elegerant archidiaconum memoratum, comparens in presentia eorumdem dixerit, super hoc requisitus ab eis, quod se opponere nolebat electioni predicte de ipso preposito celebrate, cum verisimiliter crederet quod nec illi, quorum procurator erat, se ipsi opponere de cetero intendebant. Nichilominus tamen circa eandem electionem celebratam de ipso preposito ex eo dubitationis materia est exorta, quia in scrutinio, ex quo ipsius archidiaconi electio est secuta, decem ex predictis electoribus prepositi ejusdem, scienter quosdam nominasse dicuntur indignos, propter quod videbantur eligendi ea vice potestate privati, sicque dictus archidiaconus a majore parte fuisse electus, et ipsius electio canonica extitisse, ac per consequens electio ejusdem prepositi, tam propter defectum numeri electorum, cum, subductis predictis decem, non supersint sibi nisi duo tantummodo electores, quam etiam pro eo quod ex intervallo post aliam, ut premittitur, rite factam inveniretur attemptata fuisse, penitus esse nulla; propter que dicebatur dicta electio memorati prepositi omnino cassanda, seu cassa et irrita potius nuntianda, vel saltem propterea procedendum non esse ad confirmationem ipsius, quia cum ad probandam electionem eandem, nullus ex illis canonicis, qui eidem interfuerant in Curia nostra presentibus, predicti procuratores quorundam ex eis sola decreti super eadem electione confecti serie uterentur, que fidem ad plenum facere negabatur, de forma electionis ipsius non plene constabat. Nos autem considerantes, quod prefati decem, qui nominasse dicuntur scienter indignos, quamquam de hoc non constiterit, si tamen id etiam veritatem haberet, ad electionem minime processerunt, et ideo non videntur fuisse propterea eligendi ea vice potestate privati, cum in eligentes tantummodo inveniatur pena hujusmodi a jure statuta, ex quo consequenter apparet, quod prima electio dicti archidiaconi utpote a minore parte totius capituli celebrata, nulla extitit, et tanquam nulla, reliquam de dicto preposito ex intervallo quantolibet subsecutam, nullo modo potuit impedire, de fratrum nostrorum consilio, premissis non obstantibus, de reliquis hujusmodi negotium contingentibus deliberavimus inquirendum. Quocirca discretioni vestre per apostolica scripta mandamus, quatinus de forma hujusmodi electionis sepefati prepositi, quam decreti predicti series representat, et utrum electores memorati archidiaconi ab ipsius prepositi contradictione desistant, diligentius inquirentes, si dictam electionem ipsius prepositi canonicam et prefatos ejusdem archidiaconi electores inveneritis ab hujusmodi contradictione desistere, seu non opponere, ac probare aliqua propter que debeat electionis predicte ipsius prepositi confirmatio impediri, personam memorati prepositi examinare curetis, et eadem ydonea ad regimen Ecclesie predicte reperta, electionem prefatam celebratam de ipso auctoritate apostolica confirmetis, ipsum preficientes eidem Ecclesie in episcopum et pastorem, sibique facientes munus consecrationis impendi, et a suis subditis plenarie obediri. Contradictores, etc. Si vero per eosdem dicti archidiaconi electores in contradictione sua forsitan persistentes, coram vobis proponi aliqua et probari, propter que dicta ipsius prepositi electio merito sit cassanda, vel personam ejusdem prepositi ad hujusmodi regimen insufficientem inveniri contingat, eadem electione rite cassata, dilectis filiis Cathalaunensi capitulo injungatis, ut eidem Ecclesie per electionem canonicam studeant de persona ydonea providere. Ceterum sive a predictis contradictoribus dicti prepositi aliqua ut predicitur, proponentibus propter que, si probarentur, predicta ipsius prepositi electio debeat non indigne cassari, sive ab ipso preposito, vel ejus nomine peti contigerit, ut negotium ipsum ad apostolice sedis remittatur examen, quia inibi cause hujusmodi majori solent tractari diligentia, et exacta magis maturitate decidi, volumus, et presentium vobis auctoritate mandamus, ut idem negotium ad petitionem partium, vel alterutrius ipsarum, in eo statu, in quo tunc erit, cum omnibus actis, et monimentis ad negotium ipsum spectantibus ad sedem remittatis eandem, prefixum partibus terminum peremptorium competentem, in quo per se, vel per procuratores ydoneos ad totum ipsum negotium sufficienter instructos compareant coram nobis, justam, dante Domino, sententiam recepturi. Diem autem citationis et formam et quicquid inde feceritis nobis per vestras patentes litteras, harum seriem continentes, fideliter intimetis. Quod si non omnes hiis exequendis potueritis interesse, tu, frater episcope, cum eorum altero ea nichilominus exequaris. Datum apud Urbemveterem, II nonas septembris, anno primo.