Schillmann 3289

.. abbati s. Pauli de Vanna Senonensis et .. cantori ecclesie s. Petri puellarum Aurelianensis.

Dilectus filius Nicolaus de Montigniaco, presbiter Senonensis diocesis, capellanus venerabilis fratris nostri .. Albanensis episcopi, nobis exposuit quod nos, obtentu ipsius episcopi, canonicatum ecclesie beati Martini Turonensis ac prebendam, si qua tunc vacabat ibidem, ei contulimus et providimus de illis ac ipsum investivimus per nostrum anulum de eisdem. Si vero tunc aliqua prebenda in eadem ecclesia non vacabat, nos prebendam proximo vacaturam, ibidem conferendam dicto Nicolao, donationi apostolice reservantes, decrevimus irritum et inane si secus de prebenda hujusmodi a quoquam contingeret attemptari, predicto Nicolao super hoc nostras litteras concedendo et vobis super hoc executoribus deputatis. Postmodum autem, magistrum Stephanum de Boscocommuni, capellanum nostrum, in eadem ecclesia per nostras litteras recipi mandavimus in canonicum et in fratrem, ac sibi provideri de prebenda, si qua tunc vacabat ibidem vel quamprimum ad id offerret se facultas, cetero sibi super hoc executore concesso. Idem vero magister Stephanus, eo pretextu quod primo capitulo predicte ecclesie suas litteras presentavit ab eodemque capitulo ante dictum Nicolaum in canonicum est receptus, predictum Nicolaum contendit in assecutione prebende indebite prevenire. Quare idem Nicolaus nobis humiliter supplicavit ut, cum non litterarum presentatio et receptio, sed potius canonicatus collatio et provisio in hujusmodi casu attendi debeant, cum ille statim sit canonicus illius ecclesie, cui de canonicatu providemus ejusdem, providere sibi super hoc paterna sollicitudine curaremus. Quocirca mandamus quatinus, si est ita, vos vel alter vestrum per vos vel per alium aut alios predicto Nicolao de prebenda, si qua ei de jure debita vacavit in prefata ecclesia, postquam de canonicatu ipsius ecclesie sibi duximus providendum, amoto ab ea quolibet illicito detentore, alioquin, si qua inibi vacat ad presens vel quamprimum ad id obtulerit se facultas, providere curetis, juxta priorum directarum vobis pro eo nostrarum continentiam litterarum, facientes eum predicto magistro Stephano in prebende assecutione preferri. Contradictores etc. – Datum apud Urbemveterem, V kalendas novembris, anno tertio.