Schillmann 3288

Magistro Lamuno, dicto Pilat, canonico ecclesie sancti Amati Duacensis, Atrebatensis diocesis.

Inducunt nos tue –. Sane petitio tua nobis exhibita continebat quod, cum felicis recordationis Alexander papa, predecessor noster, .. preposito ecclesie sancti Amati Duacensis, ad quem collatio prebendarum in ea pertinet, faciendi recipi unum clericum in eadem ecclesia in canonicum et in fratrem, ac providendi ei de prebenda, si qua tunc vacabat ibidem vel quamprimum ad id oportunitas se offerret, necnon contradictores per censuram ecclesiasticam, appellatione postposita, compescendi, concesserit per suas litteras liberam facultatem, idem prepositus te in predicta ecclesia recipi fecit in canonicum et in fratrem, auctoritate hujusmodi litterarum, et nichilominus promisit spontaneus et se per suas patentes litteras obligavit, super hoc prestito juramento, quod ipse nullas a sede apostolica litteras impetraret per quas tua provisio in predicta ecclesia impediri posset aut etiam retardari. Verum postmodum predictus prepositus sibi a nobis faciendi recipi duos clericos in prefata ecclesia in canonicos et in fratres et providendi eorum utrique de prebenda in prelibata ecclesia, quamprimum ad id obtulerit se facultas, necnon preferendi eos omnibus ibidem quacumque auctoritate receptis, in assecutionibus prebendarum et contradictores per censuram ecclesiasticam, appellatione postposita, compescendi concedi per nostras litteras obtinuit liberam facultatem, non facientes de premissis aliquam mentionem. Quare nobis humiliter supplicasti ut providere tibi super hoc paterna sollicitudine curaremus. Nos itaque, tuis supplicationibus inclinati, tibi auctoritate presentium indulgemus ut, premissis veris existentibus, per hujusmodi litteras nostras tali veritate tacita impetratas, super assecutione prebende in memorata ecclesia nullum possit tibi generari prejudicium vel obstaculum interponi. Nulli ergo nostre concessionis etc. Datum apud Urvemveterem, kalendis martii, anno secundo.