Pseudo-Marinus von Eboli

Schillmann 3261

Ausstellungsdatum: 1289.05.31
Rubrik: Concessio decime regni Francie facta regi Francie pro negotio regni Aragonie promovendo.
Initium: Quantis ab olim

Zum Verzeichnis Schillmann

Brieftext

Ed. Ernest Langlois, Les registres de Nicolas IV (1288–1292) 1 (Bibliothèque des Écoles françaises d’Athènes et de Rome 2e sér. 5,1, 1887) S. 212–214 Nr. 991

Venerabilibus fratribus .. Rothomagensi archiepiscopo et .. episcopo Autisiodorensi.

Quantis ab olim et quam gravibus romanam matrem ecclesiam provocavit offensis, affecit injuriis, excessibus perturbavit ille iniquitatis filius, minister nequitie, quondam Petrus, olim rex Aragonum, in totius fere orbis notitiam fame divulgatis affatibus verisimiliter creditur pervenisse. Unde felicis recordationis Martinus papa, predecessor noster, ad propulsandam tam grandis persecutionis molem, tamque infesti persecutoris instantiam, tantamque nequitiam reprimendam, necessitate ipsum cogente, varios modos et vias exquirere studuit diversaque remedia cogitare. Cui hoc precipuum tam justitia quam ejusdem Petri demerita obtulerunt, ut juste, viribus debilitatis ipsius et potentia diminuta, idem sic distraheretur ad plurima quod eum minorem ad singula contingeret inveniri. Quapropter dictum Petrum, tunc regem Aragonum, regno et terris suis regioque honore sententialiter, justitia exigente, privavit, et privans eadem regnum et terras exposuit occupanda catholicis, de quibus et prout sedes apostolica duceret providendum in eisdem regno et terris, romane ecclesie jure salvo; de utili vero et efficaci executione privationis, expositionis et occupationis hujusmodi cum fratribus suis deliberatione prehabita, de ipsorum consilio, ad christianissimum genus clare memorie Phylippi, regis Francie, aciem sue considerationis intendit, ac ipsorum regis et generis suique incliti regni sinceram fidem ad Deum, constantem devotionem ad ipsum et ecclesiam, grandemque potentiam diligenter attendens, aliquem de ipsius regis Francie filiis, alium tamen ab eo qui sibi erat in dicto regno Francie successurus, ad occupandum prefatum Aragonie regnum et terras alias que olim dicti P. fuerunt, per suas sub certa forma litteras voluit deputari. Prefatus itaque rex Francorum, hujusmodi acceptans ac etiam assumens negotium, ad predicta carissimum in Christo filium nostrum Carolum, Aragonie et Valentie regem illustrem, secundo genitum suum, elegit, cum prelatis et proceribus regni sui deliberatione premissa; et deinde idem C., rex Aragonie, ad hec fuit auctoritate sedis apostolice deputatus, prout a notitia vestra fore non credimus alienum. Sub quantis autem laboribus quantisque sumptibus sit idem negotium per carissimum in Christo filium nostrum Philippum, Francie regem illustrem, dictum Philippum patrem et alios suos huc usque deductum, quantis indigeat, quantique in ipsius prosecutione procul dubio ex causis variis non obmittenda nec contempnenda supersint, non est opus exprimere, cum possit discreto cuilibet consideranti consultius apparere. Cum igitur idem rex Francie, prefati defuncti regis filius, ipsius sui genitoris imitans, sicut letanter accepimus, laudanda vestigia, hujusmodi negotium, quantumlibet sumptuosum, laboriosum et arduum, votis ferventibus prosequatur, ad prosecutionem illius, juxta celsitudinis regalis decentiam, studiose ac viriliter intendendo, nos suum digne laudandum in hac parte propositum multipliciter in Domino commendantes, et volentes sibi super hoc, ut commodius et efficatius exequi valeat quod incepit, subventionis oportune suffragium impertiri, sibi hoc cum instantia requirenti omnium ecclesiasticorum proventuum et reddituum decimam, per tres annos, a Nativitatis beati Johannis Baptiste festo proximo numerandos, in regno Francie ac in Lugdunensi, Viennensi et Bisuntina provintiis, necnon in Cameracensi, Leodiensi, Metensi, Virdunensi et Tullensi civitatibus et diocesibus, auctoritate apostolica, de fratrum nostrorum consilio, duximus concedendam, exigendam juxta modum per sedis ejusdem providentiam ordinatum. Siquidem exactionis decime primi anni terminum primum fore statuimus festum Nativitatis dominice primo venturum; secundum vero festum Nativitatis beati Johannis deinde proximo secuturum, in duobus annis sequentibus eisdem terminis observandis. Volumus autem quod fratres nostri romane ecclesie cardinales, qui mundi nobiscum negotia perferunt et onera cotidiana supportant, ab hujusmodi prestatione decime sint exempti ac liberi penitus et immunes. Clericos preterea quorum redditus et proventus in regno, provintiis, civitatibus et diocesibus supradictis quindecim librarum turonensium parvorum valorem annuatim non excedunt teneri nolumus ad decimam memoratam; nec Templarios ac Hospitalarios, qui contra hostes fidei christiane se ac sua in ultramarinis exponere partibus non formidant, quique, propter dissensiones seculi, quas frequenter in eo suscitari contingit, in diversis mundi partibus dampna gravia pertulerunt; illis etiam personis, bonis et rebus omnibus ab ejusdem prestatione decime prorsus exceptis, quos declarationes olim diversis temporibus per sedem apostolicam edite circa decimarum prestationem hactenus exceperunt. Quoad Cistercienses autem, qui de manuum suarum laboribus terrarumque cultibus substentantur, quanquam eos nequaquam a prestatione decime hujusmodi duxerimus eximendos, ne tamen religionis observantia, que in eorum ordine laudabiliter vigere dinoscitur, perturbetur, et divina, que inibi studiis sollicitis exercentur, obsequia diminutionis dispendia patiantur, quantitatem solvendam ab eis pro ipsa decima, et modum solutionis ipsius sic duximus moderandum, ut solvant, pro rata triennii, quantum et sicut predicto Philippo regi defuncto de concessa ei per quadriennium decima conventione voluntarie prestiterunt. Ceterum, si forsan infra dictum triennium in prefato negotio pacis federa provenirent, vel contingeret ab ipsius prosecutione desisti, illud quod erit seu supererit de decima hujusmodi sibi concessa in sedis prefate dispositione, ordinatione ac voluntate libera remanebit. Et, si super premissis aut aliquo premissorum interpretatio vel declaratio quevis occurrerit facienda, erit in ipsius sedis arbitrio, et ejus beneplacito relinquetur. Cum igitur vos ad exactionem hujusmodi faciendam, solerti deliberatione premissa, duxerimus eligendos, fraternitati vestre per apostolica scripta mandamus quatenus, onus hujusmodi vobis impositum suscipientes humiliter et devote, venerabiles fratres nostros archiepiscopos, episcopos et dilectos filios electos, abbates, priores, decanos, archidiaconos, prepositos, archipresbyteros et alios ecclesiarum prelatos, capitula, conventus et collegia Cisterciensis, Cluniacensis, Premonstratensis, S. Benedicti, S. Augustini, Cartusiensis, Grandimontensis et aliorum ordinum, ceterasque alias personas ecclesiasticas, seculares et regulares, exemptas et non exemptas, per eadem regnum, provintias, civitates et dioceses constitutas, que secundum expressum modum ad dictam decimam sunt astricte, juxta datam vobis a Deo prudentiam, vos, per vos vel per alios, moneatis et efficaciter inducatis ut, diligentius attendentes quanta totius christianitatis utilitas exigit, ut, repressis ac domitis turbatoribus sue quietis et pacis, et turbine tante turbationis exploso, Christi et christianitatis ipsius negotiis contra hostes fidei prosequendis efficatius intendatur, quodque ad petenda hujusmodi eorum suffragia, quanquam non ignoremus ipsos frequenter similia pertulisse, grandis et gravis necessitas nos compellit, onera sue matris ecclesie prompta benignitate participent, et juxta eundem modum sepefatam decimam in promptitudine devotionis exolvant. Quod si monitis vestris parere in hac parte contempserint aut forte distulerint, eos universos et singulos ad id auctoritate nostra, quavis eorum appellatione cessante, cogatis. Non obstantibus quibuslibet privilegiis... Sane volumus quod neuter vestrum in exemptos sue provintie, civitatis sive diocesis, premissam exerceat potestatem, sed alter vestrum eam libere in exemptos non sue provintie, civitatis seu diocesis, per se vel per alios aut alium, exequatur; quodque quicquid fuerit de decima predicta receptum regi assignetis eidem. Ut autem vobis ex assumendis laboribus et sollicitudinibus in premissis uberius premium eterne retributionis accrescat, vos vel ecclesias vestras a prestatione hujusmodi decime non duximus eximendos, sed teneri volumus ad eandem. Pro expensis vero vestris, nichil de ipsa decima exigetis. In aliis autem predictam decimam contingentibus prosequendis, moderatas expensas de dicta decima faciatis. Ad exequendum vero predicta tam grandia et ardua magneque requirentia circumspectionis industriam, ut tutius, efficatius atque consultius executio ipsa procedat, vos ambos in cunctis, si possibilitas suppetat, adesse precipimus. Si autem vel morte vel alio impedimento, non quesito, non ficto, vestrum alterum prepediri contigerit, reliquus, hujusmodi impedimento durante, nichilominus exequatur. Cessante vero impedimento predicto, ambo simul executioni prefate, sicut premittitur, efficaciter intendatis. Dat. Reate, II kalendas junii, anno secundo.

In e. m. .. archiepiscopo Remensi, ejus suffraganeis et electis, abbatibus, prioribus, decanis, archidiaconis, prepositis, archipresbyteris et aliis ecclesiarum praelatis, necnon capitulis, conventibus et collegiis Cisterciensis, Cluniacensis, Praemonstratensis, S. Benedicti, S. Augustini, Cartusiensis, Grandimontensis et aliorum ordinum, et ceteris aliis personis ecclesiasticis, saecularibus et regularibus, non exemptis, per Remensem provinciam constitutis. Eos hortatur ut non solum praefatae decimae concessioni benignum assensum praestent, sed et in aliis regi Franciae, praedictum negotium prosequenti, consilio et auxilio assistant.

In e. m. .. archiepiscopo Viennensi et aliis Viennensis provinciae personis ecclesiasticis.

In e. m. .. archiepiscopo Bisuntino et aliis Bisuntinae provinciae personis ecclesiasticis.

In e. m. .. archiepiscopo Turonensi et aliis Turonensis provinciae personis ecclesiasticis.

In e. m. .. archiepiscopo Rothomagensi et aliis Rothomagensis provinciae personis ecclesiasticis.

In e. m. .. archiepiscopo Bituricensi et aliis Bituricensis provinciae personis ecclesiasticis.

In e. m. .. archiepiscopo Auxitano et aliis Auxitanae provinciae personis ecclesiasticis.

In e. m. .. archiepiscopo Senonensi et aliis Senonensis provinciae personis ecclesiasticis.

In e. m. suffraganeis, .. decano et capitulo Narbonensibus et aliis Narbonensis provinciae personis ecclesiasticis.

In e. m. suffraganeis, .. decano et capitulo Lugdunensibus et aliis Lugdunensis provinciae personis ecclesiasticis.

In e. m. suffraganeis, .. decano et capitulo Burdegalensibus et aliis Burdegalensis provinciae personis ecclesiasticis.

In e. m. .. Cameracensi, .. Leodiensi, .. Metensi et .. Tullensi episcopis, decano et capitulo Virdunensibus, et aliis earumdem dioecesium personis ecclesiasticis.

Handschrift

Redaktion M
Arles 60, fol. -

Parallelüberlieferung und Regesten

Papstregister: Nic.IV.991
Clemens IV.: -
Richard von Pofi: -
Berard von Neapel: -
Potthast: 22971
Regesta Imperii V: -

neue Suche