Schillmann 3240

Venerabilibus fratribus archiepiscopis et episcopis per regnum Francie constitutis.

Ad audientiam nostri apostolatus pervenit quod nonnulli laici vestrarum civitatum et diocesium in subsidium Terre Sancte crucis signaculo insigniti, quos cum familia et omnibus bonis que in presentiarum rationabiliter possident apostolica sedes per suas in consueta forma litteras sub beati Petri et sua protectione suscepit, statuens ut postquam in primo generali passagio ab eadem sede statuendo iter arripuerint transmarinum, ea omnia integra maneant et quieta donec de ipsorum reditu vel obitu certissime cognoscatur, certis sibi conservatoribus super hoc per suas similis forme litteras deputatis, pretextu dictarum litterarum et etiam immunitatum crucesignatis generaliter in generali concilio concessarum, in quo felicis recordationis Innocentius papa III, predecessor noster, pro eo quod tempus generalis passagii ad proficiscendum in dicte Terre Sancte subsidium, tunc a prefata sede statuti, unum annum in modico excedebat, voluit ut crucesignati, qui transfretare in ipso passagio debebant, a collectis vel talliis aliisque gravaminibus essent immunes, quorum personas et bona post crucem assumptam sub predicte sedis protectione suscipiens, statuit ut sub archiepiscoporum et episcoporum ac omnium prelatorum ecclesie Dei defensione consisterent, propriis nichilominus protectoribus ad hoc specialiter deputatis, ita ut donec de ipsorum obitu vel reditu certissime cognosceretur, integra et quieta manerent a talliis et collectis debitis secularibus dominis eorumdem et aliis que ad jurisdictionem ipsorum pertinent, exemptos existere se contendunt, denegantes eisdem dominis hujusmodi tallias et collectas ut tenentur solvere, ac alias coram eis tanquam suis ordinariis in causis que ad forum secularem pertinent litigare, vosque crucesignatis ipsis in hoc favorem pro vestro libito exhibetis. Nos igitur, attendentes quod ex tenore litterarum seu immunitatum hujusmodi non habetur ut dicti crucesignati hiis que per easdem litteras et immunitates in favorem executionis voti crucis assumpte taliter concessa fore noscantur antequam in generali passagio a predicta sede statuendo iter arripuerint transmarinum, vel hujusmodi passagium immineat, uti possint, et per hoc super premissis, in quibus hujusmodi occasione immunitatum, sicut predictum est, asserunt se habere, non sunt aliquatenus confovendi, universitati vestre per apostolica scripta mandamus quatenus prefatos crucesignatos earumdem civitatum et diocesium, occasione predictorum eis a dicta sede per easdem litteras et immunitates, ut premittitur, concessorum, quominus easdem tallias et collectas, ab eisdem dictis dominis suis debitas, ipsis exhibeant, et coram eis in causis litigent, super quibus forum sortiuntur ipsorum, usque ad tempus quo ab eadem sede indictum fuerit generale passagium, nullatenus defendatis. Non obstante contraria consuetudine pretextu talium immunitatum seu prefati concilii usurpata. Dat. Reate, V kalendas octobris, anno primo.