Schillmann 3127

Carissimo in Christo filio Philippo regi Francie illustri.

Grandis affectus quem ad personam tuam gerimus merito nos inducit ut ad illos qui tibi obsequntur apostolicam gratiam extendamus. Regiis itaque precibus favorabiliter annuentes auctoritate tibi presentium indulgemus ut clerici tui, quos nunc habes et habebis in posterum tuis obsequiis insistentes, quandiu eisdem obsequiis fuerint immorati, fructus, redditus et proventus beneficiorum suorum ecclesiasticorum, etiamsi personatus aut dignitates existant et curam habeant animarum, cotidianis distributionibus dumtaxat exceptis, integre percipere valeant, ac si personaliter in ecclesiis, in quibus personatus vel dignitates aut beneficia ipsa obtinent, residerent, nec interim ad faciendum in dictis ecclesiis personalem residentiam teneantur, neque ad id a quoquam valeant coartari, non obstantibus si dicti clerici in eisdem ecclesiis non fecerint primam personalem residentiam consuetam quam facere teneantur a tuis obsequiis recedentes, seu juramento ab ipsis prestito, quod non impetrabunt per se vel alios super hiis ab apostolica sede gratiam et impetrata etiam ab alio non utentur, et contrariis ecclesiarum ipsarum consuetudinibus vel statutis, juramento, confirmatione sedis apostolice aut alia quavis firmitate vallatis, et qualibet alia prefate sedis indulgentia generali vel speciali cujuscumque tenoris existat, per quam id impediri valeat vel differri, et de qua in presentibus plena et expressa seu de verbo ad verbum mentio sit habenda. Proviso quod interim hujusmodi dignitates, personatus et beneficia debitis obsequiis non fraudentur, et animarum cura in eis quibus illa imminet nullatenus negligatur. Nulli ergo ... Dat. Reate, indibus augusto, anno primo.

In e.m. .. S. Dionisii in Francia et ... S. Germani de Pratis Parisiensis monasteriorum abbatibus mandat quatenus praedictos fructus eisdem clericis ministrari faciant.