Schillmann 3105

Eisdem.

„In vestri ordinis regula, per sedem apostolicam confirmata, inter cetera continetur, quod eam professis de ipsa egredi nullo modo licebit, nec vobis licentiandi et absolvendi ab ordine ipso potestas tribuitur ex regula supradicta. Sed nonnulli ordinis vestri fratres post factam in ipso professionem ab eis infirmitate mentita, et aliis confectis mendaciis, ac per malignitatis astutias, occasionibus variis adinventis, et ambitionibus crescentibus in eisdem, a superioribus suis interdum exeundi de ordine ipso licentiam postulant, eamque obtinent ab eisdem. Interdum vero illicentiati exeunt de eodem, ad alios ordines convolantes, in quibus ad dignitates, prelaturas et officia assumuntur, non sine proprie salutis dispendio, et derogatione non modica honestatis ordinis memorati“ ... Inhibet igitur papa ne fratres praedicti ordinis fratrum minorum qui post professionem ab ipsis in ordine factam, ad quoscumque alios ordines, obtenta vel non obtenta a superioribus suis licentia, transierunt vel transierint, „ad nullam omnino administrationem vel officium curam animarum habentia, nec etiam ad aliquam dignitatem, vel prelaturam, seu personatum quoquomodo possint assumi absque apostolice sedis speciali et expressa licentia.“ In vestri ordninis … – Dat. Reate, ut supra.