Schillmann 3076

Carissimo in Christo filio Phylippo, regi Francie illustri.

Recordare, princeps inclite, quid christianis in partibus transmarinis acciderit intuere, et respice totius christianitatis obprobrium. Hereditatis dominice funiculus, Terra Sancta versa est ad alienos, ad extraneos sacratissima et alia loca ejus, inter que civitas Acconensis venit, proh dolor! noviter in ruinam; quam licet romana mater ecclesia studiose vitare studuerit, civitati eidem, ut passagii generalis adventum sufficeret expectare, in vasis maritimis, copia bellatorum, pecuniario subsidio subveniendo sollicite, prout suggessit exinde nuntiata necessitas et series super hoc oblate petitionis exegit, nichilominus tamen civitas eadem sic prompto ipsius ecclesie fulta suffragio, sic diligenter instructa, post artissime obsidionis instantiam, quam contra eam in gravi multitudine quadraginta et quatuor diebus Babilonice persecutionis pertinax continuavit instantia, die noctuque ipsam frequentibus terribilium machinarum ictibus atterendo, renovando infestos quasi continue sibi succedentes insultus, et ipsius etiam menia occultis arietando cuniculis, heu! ante faciem persequentium cecidit occupata et igni exposita per eosdem, christicolis ipsam inhabitantibus pro parte maxima in gladii ore cadentibus, reliquis, preter illos qui fuge navalis evasere presidio, captivatis, et Tyrensi civitate valido proinde terrore concussa quasi e vestigio, ejus est deditio subsecuta. Cum igitur hujusmodi Dei et totius christianitatis negotium cuncti catholici reges et principes orbis terre cordi potissime gerere debeant et vehementer affici, circa illud opem et operam impendendo sollicitam, ut votivum, auctore Domino, exitum sortiatur, serenitatem regiam rogamus et hortamur attente, instanter requirimus et obsecramus in filio Dei patris quatinus, clara progenitorum tuorum vestigia eorumque opera imitans pietatis, qui zelo devotionis et fidei fervore succensi, pro terra ipsa exposuerunt totaliter se et sua, ob reverentiam Jesu Christi, qui pro te se dire mortis exposuit passioni, sic te ipsum et regnum tuum tibique subjectos ad predictum negotium et pro ipso disponas ut illud tuo et aliorum regum et principum auxilio circumfulctum ad optatum effectum, ad laudem Dei et totius christianitatis honorem, feliciter perducatur. Et quia provida cunctorum consilia qui noverunt conditionem Terre Sancte conveniunt et fieri persuadent ut ad terram ipsam navale seu galearum subsidium cursu celeri dirigatur, cum per hoc eidem terre in tante necessitatis articulo possit utilius et efficatius subveniri ac resisti conatibus et debilitari potentia inimici, quesumus ut eidem terre super tam lugubri tamque miserabili statu ejus pie mentis affectione compatiens, suisque profundis doloribus condolens, hujusmodi subsidium juxta potentie tue vires et exigentiam necessitatis instantis ad predictam terram cum ea qua fieri poterit acceleratione transmittas. Nec sit, fili, excellentie tue grave quod petimus, sed illud, tanquam princeps catholicus, ad quem super hujusmodi Terre Sancte negotio ceterorum christianorum regum et principum et aliorum sub religione christiana degentium oculi diriguntur, promptis animis et munificentia regia exequaris, ut, preter divine retributionis premium tibi exinde proventurum, gloriose laudis in seculo sonora preconia consequaris. Super premissis autem, necnon qualiter et quo modo circa recuperationem ejusdem terre celeriter, actore Domino, proventuram, et continuationem subsidii dicte terre ac impugnationem suorum hostium faciendam, et etiam circa alia negotium ipsum tangentia possit quamtotius et utiliter, sicut expedit, provideri, cum viris expertis et providis Deumque timentibus ac statum bonum desiderantibus dicte terre consilio habito diligenti et exacta cum illis deliberatione secuta, nobis quod deliberatum fuerit in hac parte per litteras regias plene, seriatim et distincte studeas intimare. Illam in hiis diligentiam, sollicitudinem et efficatiam impensurus ut eterne beatitudinis gloriam proinde consequi merearis et nos regie devotionis promptitudinem uberibus in Domino laudibus attollamus. Et ecce venerabilem fratrem nostrum G[erardum], Spoletanum episcopum, latorem presentium, virum utique providum et discretum, ac nobis et fratribus nostris merito sue multiplicis probitatis acceptum, ad presentiam regiam propter hoc spetialiter destinamus, qui tibi in hac parte nostre intentionis propositum plenius explicabit. Dat. apud Urbemveterem, X kalendas septembris, anno quarto.