Schillmann 2989

.. decano et capitulo Parisiensibus.

Cum in singulis –. Sane pervenit ad audientiam nostram quod, cum, inter karissimum in Christo filium nostrum .. regem Francorum illustrem, ex una parte, et vos, ex altera, super quibusdam libertatibus exorta materia questionis, quedam per bajulos ejusdem regis sint commissa, propter que vos divine laudis organa suspendistis: serenitatem ipsius affectione paterna rogavimus ut hiis que causa sunt suspensionis hujusmodi, pro divina et nostra reverentia supersedere procuret. Preterea venerabilibus fratribus nostris .. Senonensi et .. Rothomagensi archiepiscopis, ac dilecto filio fratri Johanni de Monte Mirabili, ordinis fratrum Predicatorum, per litteras nostras dedimus in mandatis ut ad componendum amicabiliter inter regem eundem et vos partes suas infra spatium octo mensium post susceptionem litterarum ipsarum efficaciter interponant, et nichilominus regem ipsum moneant diligenter ut, si qua de bonis vestris et hominum vestrorum per eosdem bajulos sunt sublata, [ea] in manibus eorundem archiepiscoporum et fratris poni faciat, per ipsos usque ad totidem menses fideliter conservanda. Quocirca volumus et universitati vestre per apostolica scripta districte precipiendo mandamus quatenus, ad ea que sunt pacis, vos spontaneos et faciles exhibentes, post receptionem presentium suspensa organa, postposito difficultatis obstaculo, resumatis; mandatum nostrum taliter impleturi, ut vos reprehendi de inobedientia non contingat nec vobis propter hoc possit discrimen aliquod imminere. Dat. Laterani, VI idus martii, anno duodecimo.