Schillmann 2983

.. Patracensi, .. Corinthiensi, .. Thebano et .. Atheniensi archiepiscopis et eorum suffraganeis, et abbatibus, prioribus, decanis, archidiaconis et aliis ecclesiarum prelatis eorumque conventibus et capitulis, ac etiam clericis, latinis et grecis, per Patracensem, Corinthiensem, Thebanam et Atheniensem provincias constitutis.

Miserabilem necessitatem et statum imperii Romanie, pro quo Sacrosancta Romana Ecclesia et nonnulli viri catholici, ob exaltationem fidei christiane, diutius laborarunt et expensas maximas subierunt, jugiter ante oculos nostri cordis habentes, ac in ejus afflictionibus et pressuris destructionem negotii Terre Sancte plurimum formidantes, eidem imperio tanto validioribus cogimur auxiliis subvenire, quanto gravioribus noscitur periculis subjacere. Unde, licet pro ipsius subventione tertiam partem bonorum vestrorum mobilium atque proventuum per dilectum filium magistrum Ph[ilippum], clericum, anno primo preterito, mandaverimus colligendam, quia tamen urgentior necessitas quam unquam institerit, instat ad presens imperio memorato, et nos, pro ejus preparando succursu transmisso nuper in Franciam venerabili fratre nostro .. episcopo Anagnino, militum et aliorum etiam bellatorum multitudinem competentem ad Romanie partes in brevi proponimus destinare, aliam cum dilecto filio nobili viro Bald[uino], herede imperii prelibati, subsequenter, dante Domino, directuri: tertiam partem reddituum et proventuum eorundem anni presentis in ipsius imperii subsidium, cujus prosecutio ex necessitate vobis imminet speciali, providimus erogandam. Quocirca universitatem vestram monemus et hortamur attente, firmiter precipiendo mandantes quatenus, interesse proprium ex animo prosequentes, ipsam tertiam dilecto filio magistro Bernardo, subdiacono nostro, clerico dilecti filii nostri J[ohannis], tituli Sancte Praxedis presbiteri cardinalis, viro provido et discreto, nobis et fratribus nostris accepto, quem ad hoc specialiter destinamus, libenter et liberaliter assignetis. Alioquin, cum tante necessitatis negotium non sit negligentie committendum, sententiam quam idem propter hoc rite tulerit in rebelles, ratam habebimus et usque ad satisfactionem condignam inviolabiliter observari, auctore Domino, faciemus. Dat. ut supra.