Schillmann 2979

.. illustri regi Francie.

Inextimabilis muneris gratiam inclite recordationis progenitoribus tuis regibus Francie in eo celesti provisione collatam, quod ipsos, ut glorie fierent eterne participes, a longis retro temporibus exaltationis Ecclesie et catholice fidei magnificos gestatores, ad mentem nostram, grandi exinde concepta letitia, sepe reducimus, eamque pluries repetitam nostris adhuc tibi litteris replicamus, credentes ut quo ab ipsis exempla uberiori ad eum manantia rivulo recipit, eo illos, quibus ipsum nobilitas sanguinis et regia celsitudo parificant, virtutum conetur operibus superare. Illi quidem Ecclesiam Dei, expensis, laboribus et proprio sanguini non parcentes, a faucibus persecutorum eripere, extirpare heresim fideique hostes comprimere, et quandoque Terram Sanctam de Paganorum meruerunt manibus liberare. Propter quod ipsorum memoria, in compositione odoris effecta, et in omni ore quasi mel suavissimum indulcata, regali excellentie suggerit, suoque supplicare videtur honori, ut idem rex, sedula meditatione considerans quod, ex occupatione Constantinopolitani imperii, orientalis ecclesia in gravium frusta scismatum scinditur, Terre Sancte, de qua non nisi per ipsum securus haberetur reditus, subsidium impeditur, ager dominicus diversarum heresum spinis occupatur et tribulis, et omnium Latinorum timetur periculum in partibus habitantium Orientis: ad subventionem illius, dictorum progenitorum sequendo vestigia, auxilium et consilium plena efficacia tribuat, ac exinde suo nomini perpetue gloriam laudis acquirat. [Licet] enim ad liberationem dicti imperii, ut Terre Sancte non minus quam ei valeat provideri, Apostolica Sedes multos labores et expensas subierit: quia tamen, nisi nobis devotorum et fidelium ad id suffragetur auxilium, tantum negotium nostrarum virium metas excedit, te ad perfectionem ipsius, quod et honorem persone tue et salutem anime nichilominus continet, duximus invocandum. Verum, quia dignum videtur et congruum ut Ecclesia, cujus id respicit honorem et commodum, ad hoc auxilium conferat oportunum, celsitudinem regiam rogandam duximus at[tentius] et hortandam, in remissionem tibi peccaminum injungentes quatenus secreto et singillatim apud prelatos regni tui, et primo apud eos qui familiaritate speciali sublimitati regie sunt astricti, ut liberaliter et benigne assentiant quod ecclesie et clerici suarum diocesum in tricesima reddituum suorum usque ad triennium predictis Terre Sancte et imperio provideant, ac dicti prelati super assensu petito nobis litteras suas patentes transmittant, regalis providentia interponat sic favorabiliter, sic efficaciter partes suas, quod exinde Deum merearis habere propitium, et per sollicitudinem regalem predicta Terra et imperium de impiorum manibus liberentur. Ad hec dilectum filium .. abbatem de Fallar[a], Cisterciensis ordinis, virum Deum timentem, providum et discretum, quem propter hoc ad tuam presentiam destinamus, benigne recipere et sibi super premissis que tibi ex parte nostra dixerit, fidem indubitatam exhibere procures. Dat. Literani, VIII kalendas decembris, anno duodecimo.

In eundem modum scriptum est .. illustri regine Francie monitorie, usque: procuret. Quocirca serenitatem tuam rogamus et monemus attente quatenus super hiis apud eundem regem et dictos prelatos interponas efficaciter partes tuas.