Schillmann 2975

.. priori et fratribus Sancti Andree de Litore, Castellane diocesis.

Quotiens, apostolice provisionis –. Sane, vobis olim significantibus in statutis vestris aliqua contineri, que observari non poterant absque lesione corporum et jactura domorum, dilectis filiis .. abbati de Brundulo, Cisterciensis ordinis, et .. priori fratrum Predicatorum de Venetiis per nostras dedimus litteras in mandatis ut, ad predicta loca personaliter accedentes, si, statutis vestris diligenter inspectis, difficultates in eis aliquas invenirent, que ad lesionem vergerent et jacturam corporum et domorum, ipsa moderarentur, discretione preambula, diocesani episcopi in omnibus jure salvo. Cum itaque predicti abbas et prior, juxta formam sibi traditam in ipso negotio procede[n]tes, statutorum ipsorum rigorem tam circa jejuniorum observantiam quam circa ciborum, lectorum et vestium usum, et quedam alia, circumspectione provida temperarint, sicut in eorum litteris inde confectis plenius continetur: nos, vestris piis precibus misericorditer annuentes, quod ab eis super hiis regulariter ac provide actum est, auctoritate apostolica confirmamus et presentis scripti patrocinio communimus; tenorem statutorum hujusmodi presentibus de verbo ad verbum inseri facientes; qui talis est:

„In nomine Domini Nostri Jhesu Christi. Amen. Nos Johannes, abbas monasterii de Brondulo, Cisterciensis ordinis, et frater Albricus, prior fratrum Predicatorum de Venetiis, ex commissione domini pape Gregorii personaliter accedentes ad Sanctum Andream de Litore et habentes pre oculis solum Deum, statuta ipsorum nobis fecimus exhiberi, et, consideratis difficultatibus diligenter, que continebantur in eis, quedam ibi invenimus adeo magni gravaminis, ut a fratribus predicte ecclesie absque gravi lesione corporum et jactura dicti loci nequeant tolerari, sicut ipsi coram nobis apertissime testabantur. Unde, cum ipsi nobis devote ac humiliter supplicarent ut cum eis misericorditer ageremus, auctoritate apostolica qua fungimur in hac parte, habito diligenti consilio, et attendentes fratrum gravamina supradicta, et utilitatem tam presentium quam eorum qui in futuris temporibus in eodem loco debent Domino deservire, cum speremus quod ille ordo tam in personis quam in domibus debeat, dante Domino, dilatari, sicut de die in diem manifeste videmus, cum tot ad eos confluant, quod non possint eos loca capere, que nunc habent: cum eis ita duximus dispensandum, quod jejunent secundum Cisterciensis ordinis instituta, videlicet quod a festo sancte Crucis usque ad Pascha continuum servent jejunium; cum laborantibus vero extra claustrum et cum itinerantibus prior dispensandi habeat potestatem, prout sibi videbitur expedire, nisi in jejuniis generalibus ab Ecclesia constitutis. A Pascha vero usque ad festum sancte Crucis bis in die reficiantur, exceptis jejuniis ab Ecclesia constitutis. In toto autem Adventu et Quinquagesima, et jejuniis generalibus ab Ecclesia constitutis, et omni sexta feria, quadragesimali utantur cibo, nisi ea die Natalis Domini advenerit, aut essent in locis in quibus aliter commederetur, vel nisi precipuum festum fuerit. Aliis vero temporibus, possint uti ovis, caseo et lacte; duo pulmenta, si fieri potest, habeant singulis diebus, preter fructus, et quod prior vel ejus vicarius possit superaddere, si viderit expedire et facultas permiserit. Item, de habitu fratres duas tunicas habeant, capam, unum scapulare cum pellibus agninis vel ovinis, et simplex scapulare, quo utantur in labore et aliis utilitatibus domus; pilleum sive zuppam, sive pillicium, camisiam laneam, femoralia de lino et calciamenta competentia, cingulum et cultellum. Coctam non induant, nisi quando ministrant altari. Super culcitras autem in conventibus suis non dormiant, sed super stramenta et lanea vel filtra jacere licebit. Linteamen unum de stupa vel lana cum sclavina vel cultram habeant. Capitalia de plumis habere poterunt, que habeant in longitudine duos pedes, in latitudine unum et dimidium. Cum camisia lanea et cincti dormiant. Et omnibus supradictis utantur tam clerici quam conversi. Item mulieres ad cohabitandum in consortium nullatenus admittant. Nullus etiam vestri collegii proprium aliquod habeat. Ab esu carnium et sagimine omnes generaliter abstineant, preter debiles et egrotos, circa quos pia sit rectoris consideratio. In quibus et in aliis omnibus sit eidem rectori licitum cum discretione, omnium virtutum matre, secundum uniuscujusque debilitatem, infirmitatem et necessitatem, in vestibus, in alimentis et ordinatis licentiis dispensare.“

Nulli ergo –. Dat. Laterani, II kalendas junii, anno duodecimo.