Schillmann 2752

P. patriarche Constantinopolitano, Apostolice Sedis legato.

Quia juxta officii nostri debitum conversionem cupimus peccatorum, libenter convertentibus se manum porrigimus adjutricem, et modis quibus possumus allicimus convertendos, scientes nil Deo esse acceptius quam lucrum querere animarum. Hinc est quod fraternitatis tue precibus inclinati, piratas et illos de imperio Constantinopolitano qui Sarracenis ferrum, lignamina et alias res vetitas portaverunt, cupientes ad Ecclesie redire mandatum, absolvendi juxta formam Ecclesie ac eis salutarem pro modo culpe penitentiam injungendi auctoritate tibi presentium concedimus facultatem, proviso quod ea, que essent expensuri ad Sedem Apostolicam veniendo, morando inibi et recedendo ab ipsa, pro subsidio ejusdem imperii tibi facias assignari. Dat. Asisii, IIII nonas julii, anno XI°.