Schillmann 275

Capitulo Patracensi.

Ad custodiam Paradisi – Cum enim ecclesia Patracensi, quam velut Paradisum voluptatis dextera divina plantatam Beatus Andreas apostolus quasi quadripartito flumine irrigavit dum illam evangelicis doctrinis edocuit, informavit exemplis, illustravit miraculis, et tandem passione mortis in crucis patibulo mirifice decoravit, pastoris solatio destituta, canonici tunc presentes Guifridum archidiaconum Olenensem in suum archiepiscopum postulassent, et nos de fratrum nostrorum consilio postulationem ipsam utpote contra formam canonicam attemptatam non duxerimus admittendam, quia interest nostra ut hominem in ecclesia supradicta ponamus, qui ad imaginem et similitudinem Dei factus, donis videlicet sit dotatus naturalibus et gratuitis insignitus – dilectum filium magistrum Ber. subdiaconum et notarium nostrum – ipsi ecclesie prefecimus in archiepiscopum et pastorem – Quocirca universitati vestre mandamus quatinus ipsi tamquam patri et pastori animarum vestrarum plene ac humiliter intendatis – Dat. Anagnie, VIII idus octobris, anno primo.

In e. m. clero civitatis et dioecesis Patracensis.

In e. m. populo et universis vassallis ecclesiae Patracensis.

In e. m. suffraganeis ecclesiae Patracensis.

In e. m. nobili viro principi Achaiae.

In e. m. patriarchae Constantinopolitano.