Schillmann 2518

De unione Valentine et Diensis ecclesiarum. Ad futuram rei memoriam.

Valentinam et Diensem ecclesias, in eadem Viennensi videlicet provintia constitutas et non absque diocesium contiguitate vicinas, subjectorum ipsarum jam dudum adeo gravis tyrampnis oppressit et ab olim continuata infesta continuit oppressio ut, ad felicis recordationis Gregorii, pape noni, predecessoris nostri, aures vehemens illarum clamor ascendens, ad eum lacrimabili conquestione detulerit, quod sic nobilium et populorum ipsis subditorum malitia ebullierat in easdem, ut non erubuerint insurgere in parentes, multiplicato frequenter patris exilio et per direptionem bonorum ac alias persecutiones innumeras in matris excidio frequentato. Adjecit premissis dictarum ecclesiarum miseranda conditio humilis supplicationis instantiam, ut, cum hostilis eorundem subditorum insania contra ipsas non desisteret ab inceptis, nec ad sui defensionem earum aliqua sufficeret per se, ipsas illas, cum id exigeret urgens necessitas et evidens suaderet utilitas, dictus predecessor uniret quantum ipsarum sub unius et ejusdem rectoris moderamine unita potentia sufficientius resisteret dictorum persecutorum insultibus, et comodius eorum violentas molestias et molestas violentias propulsaret. Idem vero predecessor, horum consideratione commonitus, certis personis suis sub certa forma dedit litteris in mandatis, ut de necessitate ac utilitate predictis sollicite inquirentes, si expedire ipsis ecclesiis invenirent, illas ejus auctoritate unire curarent, contradictores per censuram ecclesiasticam, appellatione postposita, compescendo, sicut in ipsius predecessoris litteris perspeximus plenius contineri. Licet igitur, eodem predecessore morte prevento, et propter alios incidentes eventus ad id non fuerit ipsius auctoritate processum, quia tamen super hiis que idem predecessor per alios investigari mandavit et nos jam dudum maxime circa Valentinam ecclesiam, dum nos minor status haberet, et fratres nostros, qui una nobiscum nuper circa partes illas aliquandiu conversati, eadem que manibus tractaverunt, eo evidentius notitia experimentali instruxit quo hujusmodi persecutionis diuturnitas in hec usque producta tempora, ea magis reddidit manifesta, cum eisdem fratribus nostris perpensa deliberatione prehabita, memoratas Valentinam et Diensem ecclesias, propter urgentem necessitatem et evidentem utilitatem ipsarum, de quibus nobis et eisdem fratribus constitit evidenter, de ipsorum fratrum consilio, presertim cum ad hoc etiam vicinitas locorum invitet, et de apostolice plenitudine potestatis unimus, auctoritate presentium statuentes ut, statu presulum, qui nunc presunt eisdem, sine immutatione aliqua, remanente integro, tandem quovis ipsorum cedente seu etiam decedente, sic una sit earundem ecclesiarum episcopalis dignitas, quod superstes sit episcopus utriusque, Valentinensis et Diensis episcopus nominandus, ac deinceps ecclesie ipse ab uno et eodem antistite simili quin potius eadem intitulatione usuro, perpetuis temporibus gubernentur. Cujus electionem in ipsis ecclesiis alternis vicibus, set in Valentina primo, ab utriusque canonicis vocem in eadem electione, quasi corpus unum seu collegium pariter habituris, decernimus celebrandam. Quotiens autem novi pastoris creatio imminebit, illorum sit eorundem canonicorum ecclesie utriusque vocatio, quibus in illa ecclesia cui ea vice sortem electionis hujusmodi vicissitudo concesserit, jus vocationis ejusdem antea competebat. Et canonici alterutrius ecclesie, dum in illa, in qua tunc est electio facienda, propter hoc presentes fuerint, distributiones in ea cotidianas percipiant et in omnibus aliis pro ipsius canonicis admittantur. Sed alias, quo ad canonicatus, prebendas et obventiones quaslibet canonici earundem ecclesiarum in discretione sive divisione remaneant consueta. Ceterum, ne consuetudinum in eorundem canonicorum vocatione diversitas occasionem aliquam inter eos altercationis inducat, illos tantummodo canonicos ad electionem vocari statuimus qui tunc temporis fuerint in eadem provincia Viennensi. Per hoc autem venerabili fratri nostro .. Viennensi archiepiscopo, ipsarum ecclesiarum metropolitano, ejusque successoribus seu etiam Viennensi ecclesie nullum prejudicium generetur, quominus in eisdem Valentina et Diensi ecclesiis habeant alias omnia et percipiant sicut prius. Nulli ergo nostre unionis et constitutionis, etc. – Datum Vienne, VII kalendas octobris, anno quarto.