Schillmann 2458

Eidem.

Volentes expensarum onera que subire oportet dilectum filium nobilem virum .. comitem Pictavensem, qui zelo fidei et devotionis accensus crucis assumpto signaculo ad Terre Sancte succursum potenter et magnifice se accingit, alicujus subventionis aminiculo sublevari, mandamus quatinus, si qui usurarii vel alii aliqui aliena illicite detinentes de regno Francie ac Pictavensi, Tholosano, Provincie et Britanie comitatibus, penitentia ducti usuras et sic ablata restituere voluerint, si hujusmodi usurarii et detentores personas ad quas pertineant usure ac ablata predicta ignoraverint, et per diocesanos et presbyteros parrochiales eorum hoc publice proposito in locis in quibus expedire videbitur aliqui non apparuerint quibus eorum restitutio debeatur, per te vel alium aut alios, quos ad hoc duxeris deputandos, exigas et recipias de premissis usque ad tria milia marcharum argenti, eaque assignes dicto comiti, cum iter arripuerit transmarinum; quantitatem vero receptorum et nomina eorum a quibus et quantum a quolibet receperis nobis studeas tuis litteris fideliter intimare; contradictores, [etc]. Non obstantibus aliquibus litteris postmodum a Sede Apostolica impetratis, que de premissis, etc., ut in tercia superiori, usque in finem.