Schillmann 2331

Manfredo, Veronensi electo, Marchie Anconitane rectori.

Actus nepharios venerabilis fratris nostri Gerardi, episcopi Firmani, fidedignorum nobis assertione relatos, nos compellit referre conscientia, licet invitos. Ipsorum etenim enormis horribilitas a talium relatione labia nostra retraheret, nisi hoc exigeret debitum officii pastoralis, cum oneri nobis injuncte administrationis incumbat maturiori consilio periculis obviare. Sane, sicut accepimus, idem episcopus, famam suam diversis sceleribus commaculare non metuens, presumptione dampnabili dehonestat in multis, quantum in eo est, episcopalis eminentie dignitatem, ita quod in tenebras conversum est lumen ejus, et oculi sui solum ad ima demissi, superioris aeris beneficium non admittunt. Ipse siquidem, inter alias abhominationes, quas in contumeliam Redemptoris et scandalum ecclesiastice professionis dicitur exercere, laborat incontinentie vitio, detinens publice concubinam, ex qua plures filios procreavit, et nichilominus cum Deo dicatis monialibus, quarum aliquas virginitatis flore privavit, sepius committit incestum. Idem etiam episcopus inter rectores qui fuerunt pro tempore in Anconitana Marchia pro ecclesia Romana, et fideles ipsius ecclesie in eadem Marchia malitiose seminavit zizaniam, cujus occasione tota patria, juxta ipsius episcopi desiderium, ab ejusdem ecclesie devotione recessit, adherendo Manfredo, quondam principi Tarentino, cujus nuntiis in predicta marchia idem episcopus dampnabiliter adherens, nuntiis ipsis equos et alia multa donavit, et interdum concessit pecuniam mutuo, pro stipendiariis contra eandem ecclesiam conducendis, et nichilominus commune civitatis Firmane et alios quamplures, ut in devotione ipsius Manfredi persisterent, dampnabili presumptione induxit, quamplures terras et possessiones ecclesie Firmane quibusdam indevotis predicte sedis et ejusdem Manfredi parti faventibus, in emphiteosim concedendo, in anime sue periculum, ipsius sedis injuriam et contemptum et devotorum predicte sedis non modicum prejudicium et gravamen. Prefatus insuper episcopus est aliis diversis criminibus irretitus, que Deum offendunt et homines scandalizant. Nos igitur attendentes quod hec que ad nos pervenerunt non levis insinuatione clamoris, si opere completa inveniantur, eo graviori sunt in eodem episcopo animadversione plectenda, quo ejusdem episcopi in tam eminentis dignitatis gradu constituti sunt graviores excessus, ac nolentes ista sub dissimulatione transire, ne incorrecta prestent aliis audaciam committendi pejora, discretioni tue mandamus quatinus ad aliqua loca, de quibus videris expedire et ad que secure accedere poteris, te personaliter transferrens, et habens pre oculis solum Deum, si famam predicti episcopi super premissis apud bonos et graves inveneris esse lesam, inquiras per fidedignos super hiis et aliis criminibus, de quibus eum inveneris similiter publice diffamatum, sollicite veritatem, que inveneris fideliter in scriptis redacta, nobis per aliquem fidelem nuntium transmissurus. In premissis autem committendi alii vices tuas, seu inquisitionem hujusmodi per te vel per alium seu alios faciendi, tibi plenam auctoritate presentium concedimus facultatem. Datum apud Urbemveterem, XII kalendas decembris, anno tertio.